Read dyu Dɔnkiliw Ala ye kitabu 147 Bible Online

Dɔnkiliw Ala ye kitabu 147 - dyu bible

Dɔnkiliw Ala ye kitabu 147

¹Aw ka Masaba tanu. A ka ɲi dɔnkili ka la an ka Ala ye. A ka ɲi ka tanu!

²Masaba be Zeruzalɛmu dugu lɔra tugu. Isirayɛliden minw tun minɛna ka taga, a be olu lajɛnna.

³A be dusukasininw jigi tugu k'u mandimiyɔrɔw furakɛ.

⁴A ye lolow daa sigi. A ye tɔgɔ di u kelen kelen bɛɛ ma.

⁵An Matigi ka bon, barika b'a la haali. Daan t'a ka lɔnniya la.

⁶Masaba be dɛsɛbagatɔ dɛmɛ. A be mɔgɔjugu majigi fɔɔ duguma.

⁷Aw ka dɔnkili la Masaba ye k'a fo. Aw k'an ka Ala tanu ni gɔni ye.

⁸A b'a kɛ sankabaw be wili sankolo la. A be sanji labɛn dugukolo ye, a b'a kɛ biin be falen kuluw kan.

⁹A be dumuni di begɛnw ma. A be dumuni di kaankaandenw ma u kasiwaati la.

¹⁰A mako te soo ka barikatigiya la. Adamaden barika te foyi ye a fɛ.

¹¹Mɔgɔ minw be siran Masaba ɲa, minw jigi b'a ka ɲumanya kan, a be janto olu la.

¹²Zeruzalɛmu dugu mɔgɔw, aw ka Masaba boɲa. *Siyɔn dugu mɔgɔw, aw k'aw ka Ala tanu.

¹³A be barika don dugu dondaw sɔgɔnanw na kosɔbɛ. A be barika don dugudenw na dugu kɔnɔ.

¹⁴A be hɛrɛ kɛ jamana kɔnɔ. A be suman ɲanaman di fɔɔ k'aw wasa.

¹⁵A y'a ka kuma fɔ dugukolo kan. A ka kuma be taga teliya la.

¹⁶A be *sanji siminin yɛrɛkɛ i ko kɔrimugu. A b'a kɛ gilasi be kɛ yɔrɔ bɛɛ i ko bugurigwɛ.

¹⁷A b'a kɛ sanbɛrɛ be ben. Jɔn be se ka lɔ o nɛnɛ ɲa?

¹⁸A be kuma dɔrɔn, u be yelen. A b'a kɛ fɔɲɔ be fiyɛ, jii be woyo.

¹⁹A b'a ka kuma fɔ Yakuba kɔmɔgɔw ye. A b'a ka kolatigɛninw n'a ka fɔtaw yira Isirayɛlidenw na.

²⁰A ma o ɲɔgɔn kɛ siya wɛrɛw si ye, olu si t'a ka fɔtaw lɔn. Aw ka Masaba tanu.