Read dyu Dɔnkiliw Ala ye kitabu 148 Bible Online

Dɔnkiliw Ala ye kitabu 148 - dyu bible

Dɔnkiliw Ala ye kitabu 148

¹Aw ka Masaba tanu. Aw k'a tanu sankolo kɔnɔ, aw k'a tanu sanfɛ yɔrɔw la.

²Aw k'a tanu, a ka mɛlɛkɛw bɛɛ, aw k'a tanu, sanfɛfɛnw bɛɛ.

³Aw k'a tanu, tile ni kalo, aw k'a tanu, lolow bɛɛ minw be manamana.

⁴Aw k'a tanu, sankolo yɔrɔ bɛɛ, aw k'a tanu, sankolo jii bɛɛ.

⁵U bɛɛ ka Masaba tanu, bari a kumana dɔrɔn, u bɛɛ danna.

⁶A y'u sigi u ka to yen kudayi. A ye sariya dɔ sigi u ye, u man kan ka min cɛn.

⁷Dugukolo kan fɛɛnw, aw ye Masaba tanu. Kɔgɔji kɔnɔ fɛɛnw ni jibaw, aw k'a tanu,

⁸tasuma, ele ni sanbɛrɛ ni *sanji siminin ani bugun, ni fɔɲɔba, aw minw b'a ka kuma bato.

⁹Kuluw ni tintinw bɛɛ, yiri dentaw ni sɛdiriyiribabaw bɛɛ,

¹⁰kongosogow ni begɛnw bɛɛ, fɛɛn fofotaw ni kɔnɔw, aw ka Masaba tanu.

¹¹Aw k'a tanu, dugukolo kan masaw ni jamanadenw, ɲamɔgɔw ni dugukolo kan mɔgɔbabaw bɛɛ,

¹²kanbelenw ni sunguruw, mɔgɔkɔrɔbaw ani denmisɛnw.

¹³Aw ka Masaba tanu, bari ale kelen tɔgɔ le ka bon. A ka sebagaya be sankolo la ni dugukolo kan.

¹⁴A ye barika don a ka jama na. O ye kunkɔrɔta ye a ɲasiranbagaw bɛɛ fɛ, a ka jama Isirayɛli fɛ, min koo ka gwɛlɛ a ma. Aw ka Masaba tanu.