Read dyu Dɔnkiliw Ala ye kitabu 17 Bible Online

Dɔnkiliw Ala ye kitabu 17 - dyu bible

Dɔnkiliw Ala ye kitabu 17

¹Dawuda ka dɔnkili dɔ. Masaba, mɛnni kɛ ne ka daalili la tilenninya kosɔn, ne kasikan mɛn. I tulo malɔ ne ka daalilikan na, n ye min kɛ ni kɔnɔgwɛ ye.

²Ne ka tiɲɛ yira. Koo min tilennin lo, ele b'o lɔn.

³I ye ne sɛgɛsɛgɛ sufɛ ka n filɛ. I ye n kɔrɔbɔ, i ma foyi ye n la. N ka kuma ni n ka miiriya kɛra kelen ye.

⁴Ni ne ye mɔgɔw ka kɛwalijuguw filɛ, i ka kuma kosɔn, ne be n yɛrɛ kɔlɔsi sirajugu ma.

⁵Ne tora i ka sira kan, ne seen te talon.

⁶Ala, ne b'i daali, bari e be ne lamɛnna. E tulo malɔ ka mɛnni kɛ n fɛ sa.

⁷I ka ɲumanya yira ka ne kisi. Ka ne to i kɔrɔ, ne juguw te se ka foyi kɛ ne la.

⁸Ne mara i ko mɔgɔ b'a ɲaden kɔlɔsi cogo min na. Ne dogo i gaman kɔrɔ

⁹mɔgɔjuguw kosɔn, minw be ne tɔɔrɔla. Jugu farimanw ye ne lamini.

¹⁰U te makari fewu. U ka kuma ye yɛrɛboɲakuma ye.

¹¹U be tugura ne kɔ, u yɛrɛ ye n lamini ka ban. U be n filɛ, u b'a fɛ ka n ben duguma.

¹²U be i ko jara min kɔrɔtɔnin lo ka sogo minɛ. U be i ko wara min dogora ka kɔnɔni kɛ.

¹³Masaba, wili ka taga ne juguw kama k'u la duguma. Ne bɔsi n juguw bolo n'i ka murujan ye.

¹⁴Masaba, u halaki n'i ka sebagaya ye. U tunu ka bɔ dugukolo kan, u kana sɔrɔ ɲanamanw cɛma. I ye jii fariman min labɛn u ye, a to u b'o min ka fa. U deenw fana k'a min ka fa, k'a tɔɔ to u deenw ye.

¹⁵Ne kɔni, tilenninya kosɔn, ne bena i ye. Ne kununtɔ, e yeli dɔrɔn bena ne nisɔndiya kosɔbɛ.