Read dyu Dɔnkiliw Ala ye kitabu 18 Bible Online

Dɔnkiliw Ala ye kitabu 18 - dyu bible

Dɔnkiliw Ala ye kitabu 18

¹Dɔnkililabagaw kuntigi ka dɔnkili. Masaba ka baarakɛla Dawuda ka dɔnkili. Masaba y'a bɔsi Sayuli n'a jugu tɔw bɛɛ bolo tuma min na, a tun ye dɔnkili nin le la a ye.

²A tun ko: «E koo ka di ne ye Masaba, ele be fanga di ne ma.»

³Masaba le ye ne tangakabakuru, ni ne dogoyɔrɔ, ani ne kunmabɔbaga ye. Ne ka Ala le ye ne tangakabakuru ye, ne be dogo a kɔrɔ. Ne tangabaga lo, Setigi min be ne kisi. Ne ka dogoyɔrɔ barikaman lo.

⁴Masaba ka tanu! Ne y'a ka dɛmɛ ɲini dɔrɔn, ne bɔsira n juguw bolo.

⁵Saya tun ye ne dɛrɛ ka ban. Halakili siranya tun ye ne minɛ.

⁶Kaburu dibi tun ye ne lamini ka ban. Ne tun donna saya ka jɔɔ kɔnɔ ka ban.

⁷Ka ne to n ka dusukasi la, ne ye Masaba n ka Ala daali, ne kasir'a kɔ. K'a to a ka soo kɔnɔ, a ye ne kaan mɛn, ne kulekan donn'a tulo la.

⁸Dugukolo yuguyugura ka yɛrɛyɛrɛ, kuluw juuw yuguyugura ka yɛrɛyɛrɛ Masaba ka dimi kosɔn.

⁹Sisi tun be bɔr'a nuun na, tasuma fariman ni takami tun be bɔr'a daa la.

¹⁰A ye sankolo dayɛlɛ ka jigi, sankababa tun b'a seen kɔrɔ.

¹¹A tun siginin be *serubɛn kan n'a be panna. A tun be lerula fɔɲɔ kɔnɔ.

¹²A tun y'a yɛrɛ dogo sankaba suma kɔrɔ, o tun kɛra sankababa ye k'a datugu.

¹³Yeelen dɔ tun b'a ka sankaba fana tɛmɛna, sanbɛrɛ ni takami tun be bɔra.

¹⁴Masaba y'a kɛ saan pɛrɛnna, Fɛɛn bɛɛ kuntigi y'a kaan bɔ, saan manamanana, sanbɛrɛ jigira.

¹⁵A y'a ka biɲɛw bon ka ne juguw yɛrɛkɛ. A y'a kɛ saan manamanana kosɔbɛ k'u jɛnsɛn.

¹⁶Masaba ka bagabagali n'a ka dimi kosɔn, kɔgɔji jara fɔɔ a dingɛ daan bɛɛ yera. Diɲɛ juu sigiyɔrɔ bilara kɛnɛ kan.

¹⁷Ka Masaba to sankolo la, a ye ne minɛ. A ye ne sama ka n bɔ jiba kɔnɔ.

¹⁸A ye ne bɔsi n jugu barikamanw bolo, ne kɛlɛbagaw, minw barika tun ka bon ni ne ta ye.

¹⁹U tun ye ne kɛlɛ ne dusukasilon na, nga Masaba ye ne dɛmɛ.

²⁰A ye ne bɔsi ka lafiya di ne ma. A ye ne bɔsi bari ne koo ka d'a ye.

²¹Masaba ye ne sara ka kɛɲɛ ni n ka tilenninya ye. A ye ne minɛ ka kɛɲɛ ni n ka jalakibaliya ye.

²²Ne ye n ka Masaba ka fɔta bato, ne ma kojugu kɛ n ka Ala ɲakɔrɔ.

²³A ye min bɛɛ fɔ, ne y'o bato. Ne te ban a ka sariya ma.

²⁴Jalakiyɔrɔ si ma sɔrɔ ne la a ɲakɔrɔ. Ne ye n yɛrɛ kɔlɔsi kojugu la.

²⁵Masaba ye ne sara ka kɛɲɛ ni n ka tilenninya ye. A y'o kɛ ka kɛɲɛ ni n ka jalakibaliya ye a ɲakɔrɔ.

²⁶Masaba i be koɲuman kɛ mɔgɔɲuman ye. E tilennin lo mɔgɔtilennin faan fɛ.

²⁷Masaba, mɔgɔ min kɔnɔ gwɛra, e be gwɛ o tigi ye. E fana be mɔgɔjugu minɛcogo lɔn.

²⁸Ele lo be sigɛnbagatɔ kisi, ele lo be yɛrɛboɲala majigi.

²⁹Masaba, ele lo be yeelen bɔ ne ye. Ne ka Ala, ele lo be yeelen bɔ ne ye dibi la.

³⁰Ne be girin kɛlɛbolo kan ele Ala lo sababu la. Ne be se ka dugu laminikogo sago ele lo barika la.

³¹Fiɲɛ te Ala ka siraw la, Masaba ka fɔtaw ye tiɲɛ ye. Mɔgɔ minw b'u yɛrɛ dogo a fɛ, a be olu tanga i ko nigɛkunbɛnnan.

³²Bari Ala ye jɔn ye ni Masaba tɛ? Jɔn le ye tangakabakuru ye ni an ka Ala tɛ?

³³Ale lo be barika don ne la, ka ne bila siraɲuman kan.

³⁴ A ye ne seen kɛ i ko minan ta. O la, ne be se ka lɔ tintinyɔrɔ la.

³⁵Ale lo be ne dege ni kɛlɛkɛcogo ye, ani ka kala ziralaman labɛn.

³⁶Ele Ala le b'i ka sesɔrɔli nigɛkunbɛnnan di ne ma. I ka sebagaya be ne dɛmɛ. Ne kɛra mɔgɔbaba ye i ka dɛmɛ kosɔn.

³⁷Ele le be ne ka tɛmɛyɔrɔ labɛn, o la, ne te talon.

³⁸N be n juguw kɔgwɛn k'u sɔrɔ. N b'u halaki pewu ka sɔrɔ ka kɔsegi.

³⁹N b'u halaki, u te se ka wili tugu, u be ben ne seen kɔrɔ.

⁴⁰I be barika don ne la kɛlɛ kama. I be ne kɛlɛbagaw majigi ne kɔrɔ.

⁴¹I b'a kɛ ne juguw b'u kɔɔ di ka boli ne ɲa, ne be n kɔniyabagaw halaki.

⁴²U be kasi ka bɔsibaga ɲini, u t'a sɔrɔ. U be Masaba daali, ale t'u jaabi.

⁴³Ne b'u kɛ i ko buguri, fɔɲɔ be taga ni min ye. Ne b'u cɛ ka bɔ yen i ko pɔtɔpɔtɔ, bɔlɔn kɔnɔ.

⁴⁴I be ne tanga jama ka muruti ma. I ye ne kɛ siyaw kuntigi ye. Ne te siya minw lɔn, olu be kolo ne ye.

⁴⁵U be ne ka fɔtaw bato u fɔtɔ yɛrɛ. Lonanw yɛrɛyɛrɛtɔ be na ne ɲakɔrɔ,

⁴⁶u jigi tigɛra, u yɛrɛyɛrɛtɔ be bɔra u ka dogoyɔrɔ barikamanw na.

⁴⁷Masaba, e tɔgɔ ka tanu! Boɲa ka la ne tangakabakuru kan! Ne kisibaga Ala ka tanu!

⁴⁸Ala le be ne mɔnɛ bɔ, Ala le be siyaw kolo ne ye.

⁴⁹Ale lo be ne bɔsi ne juguw bolo. Ala, e b'a kɛ n be se n juguw kɔrɔ. E be n kisi mɔgɔ farimanw ma.

⁵⁰ Masaba, o le y'a to ne bena i tanu siya wɛrɛw cɛma. Ne bena dɔnkili la k'i tɔgɔ boɲa.

⁵¹Masaba le be see d'a ka masacɛ ma kosɔbɛ. A be koɲuman kɛ a ka mɔgɔwolomanin Dawuda n'a kɔmɔgɔw ye tuma bɛɛ.