Read dyu Dɔnkiliw Ala ye kitabu 22 Bible Online

Dɔnkiliw Ala ye kitabu 22 - dyu bible

Dɔnkiliw Ala ye kitabu 22

¹Dɔnkililabagaw kuntigi ka dɔnkili, u ko min ma «Sɔgɔmadafɛ mankalanin.» Dawuda ka dɔnkili dɔ.

² Ne ka Ala, ne ka Ala, mun na i ye ne bila? Mun na i y'i yɔrɔ jaɲa ne la ten? I te ne kisi, i te ne kasikan mɛnna.

³Ne ka Ala, ne kasira i kɔ tilefɛ, e ma ne jaabi. Sufɛ fana, ne ma lafiɲɛ.

⁴K'a sɔrɔ ele Ala ye senu ye, e b'i ka masasigilan kan Isirayɛlidenw ka tanuliw cɛma.

⁵An faaw jigi tun b'i kan. U jigi tun b'i kan, i y'u kisi.

⁶U tun kasira i nɔɔ fɛ, i y'u kisi. U y'u jigi la i kan, i y'u jigi fa.

⁷Ne kɔni be i ko tumu, ne te adamaden bɔ yɛrɛ. Mɔgɔw be ne nɛni, bɛɛ be ne dɔgɔya.

⁸ Ne yebagaw bɛɛ be yɛlɛ ne ma. U be kuma ka to k'u kuun firinfirin.

⁹ U b'a fɔra ko: «A y'a jigi la Masaba kan, aw k'a to ale k'a kisi sa! Ale k'a kisi sa, bari a koo ka d'a ye.»

¹⁰Masaba, ele le y'a kɛ ne bɔra n baa kɔnɔ, i y'i janto ne la n baa bolo.

¹¹Ne y'i ta ye kabini ne wolotuma. Ka ne to n baa kɔnɔ, ele le ye ne ka Ala ye.

¹²Kana i yɔrɔ jaɲa ne la, bari gwɛlɛya sera, dɛmɛbaga te ne fɛ.

¹³Ne juguw ye ne lamini i ko tura caaman, u ye ne koori i ko *Basan tura farimanw.

¹⁴U be i ko jara minw be sɔngɔra, minw y'u daaw yɛlɛ ne kama.

¹⁵Ne fanga be banna ka taga i ko banabagatɔ. Ne fari be fagara. N te se ka lɔ tugu.

¹⁶Ne kaan jara i ko dagakolon. N daa jara. E ye ne bila kaburuda la.

¹⁷Benkannikɛlaw ye n lamini. O wulu nunu ma bɔyɔrɔ si to ne ye, u ye ne bolo ni n seenw siri.

¹⁸Ne be se ka n kolow jati n fasakojugu fɛ. Ne juguw ɲaa be ne le kan dɔrɔn, u be n filɛla.

¹⁹ U ye ne ka faniw tilan ɲɔgɔn cɛ, u ye kala la janko ka ne ka foroca sɔrɔbaga lɔn.

²⁰Masaba, kana i yɔrɔ jaɲa ne la, e min be fanga di ne ma. Na joona ka ne dɛmɛ.

²¹Ne kisi murujan ma. Ne tanga wulu juguman nunu daa ma.

²²Ne kisi ka n bɔ jara daa la, ne kisi kongomisi gɔɔnw ma. Unhun tigi! I ye ne jaabi.

²³ Ne bena i koo fɔ n balimaw ye, ne bena i tanu jama cɛma.

²⁴Aw minw be siran Masaba ɲa, aw k'a tanu. Aw Isirayɛlidenw bɛɛ, aw k'a boɲa, aw ka yɛrɛyɛrɛ a ɲakɔrɔ.

²⁵Bari Masaba ma sigɛnbagatɔ bila k'a to kɔfɛ gwɛlɛya waati la. A m'a yɛrɛ dogo a la fana, a b'a lamɛn a kasituma na.

²⁶Ne bena e tanu jamaba cɛma e yɛrɛ sababu la. Ne bena n ka dajuruw sara i ɲasiranbagaw ɲana.

²⁷Dɛsɛbagatɔw bena dumuni kɛ fɔɔ ka fa. Masaba ɲinibagaw k'a boɲa, u fana ka sijan sɔrɔ.

²⁸Diɲɛ danyɔrɔ mɔgɔw bɛɛ hakili bena to Masaba la, u bena kɔsegi a ma. Siyaw bɛɛ bena u kunbiri gwan a kɔrɔ.

²⁹Bari Masaba le ye kuntigi ye, ale lo be siyaw mara.

³⁰Dugukolo kan setigiw bɛɛ bena u kunbiri gwan a ɲakɔrɔ, a ye minw ka kalifa minɛ u la, u bɛɛ bena u kunbiri gwan a ɲakɔrɔ.

³¹U deenw bena baara kɛ Matigi ye, u ben'a koo fɔ waati nata mɔgɔw ye.

³²U ben'a ka kɛwaliɲuman koo fɔ, u bena o fɔ waati nata mɔgɔw ye.