Read dyu Dɔnkiliw Ala ye kitabu 23 Bible Online

Dɔnkiliw Ala ye kitabu 23 - dyu bible

Dɔnkiliw Ala ye kitabu 23

¹Dawuda ka dɔnkili dɔ. Masaba le ye ne marabaga ye, i ko sagadɛndɛbaga, o la, ne tena dɛsɛ foyi la.

² A b'a to ne be lafiɲɛ binkɛnɛ yɔrɔ la, a be taga ni ne ye jida la ɲasuma yɔrɔ la.

³A be ne barika lakuraya a tɔgɔ boɲa kama, a be n seen bila siratilennin kan.

⁴Hali ni ne be taama dibijugu kɔnɔ, ne tena siran foyi ɲa. E be ni ne ye, e ka dɛndɛbere be ne bila siraɲuman kan ka ne hakili sigi.

⁵E be dumuni sigi ne kɔrɔ n juguw ɲana. E be ne minɛ ni nisɔndiya ye. [1] E be ne ka filen fa kosɔbɛ.

⁶Tiɲɛ na, hɛrɛ ni ɲumanya le ye ne ta ye loon bɛɛ, hali fɔɔ ka taga ne sii ban. Ne fana bena to Masaba ka soo kɔnɔ ne sii bɛɛ la.