Read dyu Dɔnkiliw Ala ye kitabu 26 Bible Online

Dɔnkiliw Ala ye kitabu 26 - dyu bible

Dɔnkiliw Ala ye kitabu 26

¹Dawuda ka dɔnkili dɔ. Masaba, e yɛrɛ ka ne ka koo filɛ, bari jalakiyɔrɔ te ne la. Ne jigi bɛɛ be ele Masaba le kan, ne te siga.

²Masaba, e ka ne sɛgɛsɛgɛ kosɔbɛ, e ka ne ka miiri, ani n kɔnɔnako filɛ.

³Bari e ka ɲumanya tora ne kan, ne fana tilennin be i ma.

⁴Ne te sigi ni namaramɔgɔw ye, n fana te to ni filankafɔw ye.

⁵Kojugukɛlaw ka jɛnkulu koo man di n ye, n fana te sɔn ka sigi ni mɔgɔjuguw ye.

⁶Ne be n tigɛ ko k'a yira ko ne gwɛnin lo. Masaba, ne b'i ka sarakabɔyɔrɔ munumunu,

⁷janko n ka se k'i tanu, ani ka se k'i ka ɲumanya koo fɔ.

⁸Masaba, a ka di ne ye ka to e ka soo kɔnɔ, i ka nɔɔrɔ yɔrɔ la.

⁹Kana ne minɛ i ko kojugukɛla, kan'a to ne be sa i ko mɔgɔfagala.

¹⁰Minw be to ka kokolonw kɛ, u bolow fanin be daa sanfɛnw na.

¹¹Ne kɔni be to n ka mɔgɔɲumanya la, e ka makari ne la ka ne hɔrɔnya.

¹²Ne kɔni be yɔrɔɲuman na, ne bena barika la Masaba ye jama cɛma.