Read dyu Dɔnkiliw Ala ye kitabu 34 Bible Online

Dɔnkiliw Ala ye kitabu 34 - dyu bible

Dɔnkiliw Ala ye kitabu 34

¹ Dawuda ka dɔnkili Ala ye. A tun y'a yɛrɛ kɛ i ko fatɔ Abimelɛki ɲana tuma min na ale y'a gwɛn ka taga, a ye nin dɔnkili nin la.

²Ne bena barika la Masaba ye waati bɛɛ la, ne ben'a tanu tuma bɛɛ.

³Ne ben'a tanu a ka kɛtaw kosɔn. Mɔgɔmajiginiw, aw ka mɛnni kɛ ne fɛ ka nisɔndiya.

⁴Aw ka Masaba makiri ni ne ye, an k'a tɔgɔ tanu ɲɔgɔn fɛ.

⁵Ne ye Masaba yɔrɔ ɲini, a ye ne jaabi. A ye ne kisi n ka siranyakow bɛɛ ma.

⁶N'i y'i ɲaa sin a ma, i be nisɔndiya, maloya fana t'i sɔrɔ.

⁷Sigɛnbagatɔ kasir'a kɔ, a y'a jaabi. A y'a bɔsi k'a bɔ a ka dusukasi bɛɛ la.

⁸Masaba ka mɛlɛkɛ be to a ɲasiranbagaw gɛrɛfɛ k'u kisi.

⁹ Aw k'a filɛ k'a lɔn ko Masaba ka ɲi. Mɔgɔ minw b'u yɛrɛ kalifa a ma, o tigiw dagamuna.

¹⁰Aw minw ye Masaba ta ye, aw ka siran a ɲa, bari foyi te dɛsɛ a ɲasiranbaga la.

¹¹Hali jaraw be tɔɔrɔ kɔngɔ bolo, nga Masaba ɲasiranbagaw te fɔn foyi la.

¹²Ne deenw, aw ye na mɛnni kɛ ne fɛ, ne bena aw ladi Masaba ɲasiranko la.

¹³ Ni mɔgɔ dɔ b'a fɛ ka sii sɔrɔ, n'a tigi b'a fɛ ka hɛrɛ ni sijan sɔrɔ,

¹⁴a tigi k'a yɛrɛ minɛ kumajugu fɔli, ani namarakuma na.

¹⁵A ka kojugu dabila ka koɲuman kɛ, ka banba ka hɛrɛ ɲini.

¹⁶Masaba be janto mɔgɔtilenninw na, a b'a tulo malɔ u kasikan na.

¹⁷A be wili kojugukɛlaw kama. A t'a fɛ u koo ka mɛn dugukolo kan tugu.

¹⁸A daan ye mɔgɔtilenninw ka kasi dɔrɔn, Masaba b'u kaan mɛn. A b'u kisi ka bɔ u ka dusukasi bɛɛ la.

¹⁹Masaba be dusukasibagaw gɛrɛfɛ. A be mɔgɔ jigitigɛninw kisi.

²⁰Gwɛlɛya caaman be mɔgɔtilennin sɔrɔ, nga Masaba b'a kisi o bɛɛ la.

²¹ Masaba y'a kolow bɛɛ tanga, u si ma kari.

²²Gwɛlɛya le bena tɛmɛ ni mɔgɔjugu ye, mɔgɔtilennin juguw bena halaki.

²³Masaba b'a ka baaradenw nii kisi. Mɔgɔ minw b'u jigi la a kan, jalakiyɔrɔ tena sɔrɔ olu la.