Read dyu Dɔnkiliw Ala ye kitabu 35 Bible Online

Dɔnkiliw Ala ye kitabu 35 - dyu bible

Dɔnkiliw Ala ye kitabu 35

¹Dawuda ka dɔnkili dɔ. Masaba, kɛ ne juguw kɛlɛbaga ye, ne kɛlɛbagaw kɛlɛ.

²E ka nigɛkunbɛnnanw ta ka na ne dɛmɛ.

³Taman ni jende dadiman ta ne tɔɔrɔbagaw kama. A yira ne la ko ele le be ne kisi.

⁴Mɔgɔ minw b'a fɛ ne ka sa, olu ka maloya, u kuun ka surun. Minw be kojugu miirila ne kama, olu ka dɛsɛ, u ka maloya.

⁵Mɛlɛkɛ bena u gwɛn tuma min na, u ka kɛ i ko sumanɲaga, fɔɲɔ be taga ni min ye.

⁶Mɛlɛkɛ bena u gwɛn tuma min na, u tɛmɛyɔrɔ ka kɛ dibiyɔrɔ ye min be nɔgɔnɔgɔ.

⁷U ye dingɛ sogi ka jaan la ne ɲa janko ka ne faga, k'a sɔrɔ ne ma foyi kɛ.

⁸A to balinako dɔ k'u sɔrɔ u te min kala ma. U yɛrɛ ka jaan k'u minɛ, u yɛrɛ ka ben u ka dingɛ kɔnɔ.

⁹Ne kɔni bena nisɔndiya Masaba barika la, ne bena nisɔndiya a ka dɛmɛ kosɔn.

¹⁰Ne ben'a fɔ n yɛrɛ kɔnɔ ko: «Masaba, jɔn be i ko ele? E be dɛsɛbagatɔ bɔsi a tɔɔrɔbaga bolo, e be sigɛnbagatɔ bɔsi a sigɛnbaga bolo.»

¹¹Seerejuguw be wili, u be ne ɲininga koo la ne te minw kala ma.

¹²U be ne sara ni kojugu ye koɲuman nɔɔ na, ne tora n kelen.

¹³U ka bana tuma na, ne dusu tun kasira kosɔbɛ fɔɔ n y'o dusukasifani don. Ne ye n yɛrɛ majigi ka suun don, ka to daalili la dɔrɔn.

¹⁴Ne tun y'a kɛ i ko ne teri ka koo, walima n balima dɔ ka koo. Ne dusu tun kasira kosɔbɛ, i ko ne baa yɛrɛ le sara.

¹⁵Ni ne dɛsɛra, u be ɲɔgɔn lajɛn ka nisɔndiya. N te mɔgɔ minw lɔn, olu le be woo cira ne la tuma bɛɛ.

¹⁶Ni ne talonna, u be yɛlɛ kosɔbɛ. U b'u ɲiiw kɛ ka ne bagabaga.

¹⁷Matigi, e bena u to ten wa? Ne tanga kojugukɛla nunu ma, ne kisi jara nunu ma.

¹⁸Ne bena i bato jamaba cɛma, ne bena i tanu mɔgɔ caaman cɛma.

¹⁹ E kan'a to ne jugu be nisɔndiya ne ka koo la, olu minw be n kɔniya gwansan ka to ka ɲamunu tigɛ n na.

²⁰Hɛrɛkuma t'u daa la. Jamanaden minw hakili siginin lo, u be namara sirila olu kama.

²¹U b'u daa waga ne kama k'a fɔ ko: «Hee! An ɲaa b'a la.»

²²Masaba, i y'o ye kɛ, kana u to ten. Matigi, kana i yɔrɔ jaɲa ne la.

²³Wili ka ne ka tiɲɛ fɔ. Ne ka Ala, ne Matigi, ne ka koo ɲanabɔ.

²⁴Masaba ne ka Ala, ne ka tiɲɛ yira i ka tilenninya kosɔn, u kana se ka nisɔndiya ne kosɔn.

²⁵U kana se k'a fɔ ko: «Cɔ! An tun be min fɛ, o le kɛra.» U kan'a fɔ fana ko: «An ser'a kɔrɔ.»

²⁶Mɔgɔ minw be nisɔndiya ne sɛgɛnko la, minw b'u yɛrɛ fisaya ni ne ye, olu kuun ka surun.

²⁷Minw be ne ka tiɲɛtigiya fɛ, olu ka nisɔndiya kosɔbɛ. U ka to k'a fɔ kudayi ko: «Masaba ka tanu, ale min b'a ka baarakɛla ka hɛrɛ fɛ.»

²⁸Masaba, ne bena i ka tilenninya fɔ, ne bena i tanu loon bɛɛ.