Read dyu Dɔnkiliw Ala ye kitabu 41 Bible Online

Dɔnkiliw Ala ye kitabu 41 - dyu bible

Dɔnkiliw Ala ye kitabu 41

¹Dɔnkililabagaw kuntigi ka dɔnkili. Dawuda ka dɔnkili dɔ.

²Mɔgɔ min be dɛsɛbagatɔ jati, o tigi dagamunin lo. Masaba bena o tigi bɔsi gwɛlɛya loon na.

³A b'o tigi mara, ani k'a to nii na. A t'a to a be don a juguw bolo.

⁴Masaba b'a dɛmɛ sigɛn waati la, a be janto a la bana waati la.

⁵Ne kɔni b'a fɔ Masaba ye ko: «Makari ne la ka ne kɛnɛya. Tiɲɛ lo, ne donna i gasi la.

⁶Ne jugu be kumajugu fɔra ne kosɔn ko: ‹A bena sa tuma jumɛn? A tɔgɔ bena tunu tuma jumɛn?›

⁷Ni min mana ne filɛ, o tigi be kumafu le fɔ. A be galon labɛn, a bɔtɔ dɔrɔn, a b'o fɔ.

⁸N koo man di minw ye, olu be ɲɔgɔn kori ka to ka ŋunuŋunu ne kama. U be ne halakiko le miiri la.

⁹U ko: ‹Kojugu dɔ le b'a sigɛnna ten. A filɛ, a lara, a tena wili tugu.›

¹⁰ Ne terisɔbɛ tigitigi lo, n jigi tun be min kan, ale min tun be dumuni kɛ ni ne ye, o yɛrɛ le wilila ne kama.

¹¹Masaba, makari ne la ka ne wili, ne bena n mɔnɛ bɔ u la.

¹²Ne jugu ma se ne kɔrɔ. Ne y'a lɔn o le fɛ ko e be ne fɛ.

¹³Ne kɔni, e ye ne mara, n jalakibali tora. I ye ne to i ɲakɔrɔ kudayi.»

¹⁴ Barika ka la Masaba, Isirayɛli ka Ala ye kudayi. Amiina yarabi.