Read dyu Dɔnkiliw Ala ye kitabu 45 Bible Online

Dɔnkiliw Ala ye kitabu 45 - dyu bible

Dɔnkiliw Ala ye kitabu 45

¹Dɔnkililabagaw kuntigi ka dɔnkili, u ko min ma «Feeren.» Gɔni le be fɔ a latuma na. Kore kɔmɔgɔw ka dɔnkili dɔ. Kanuya ta.

²Kuma diman ye ne kɔnɔ fa, ne be masacɛ makiri. N daa ka kɛ i ko sɛbɛnnikɛlaŋana ka sɛbɛnnikala.

³E cɛɛ ka ɲi ka tɛmɛ adamadenw bɛɛ kan. Nɛɛmakuma le be bɔ i daa la. Ala kɔni y'i ta ɲa kudayi.

⁴Kɛlɛdenŋana, e ka murujan ta k'o siri i cɛɛ la. O le y'i ka nɔɔrɔ n'i ka boɲa ye.

⁵E ka yɛlɛ soo kan ka taga ni dawula ye ka kɛlɛ kɛ tiɲɛ ni tilenninya kosɔn. I ka sebagaya kɛ ka kobabaw kɛ.

⁶E ka biɲɛw daa ka di, u be ele masa jugu dusu sɔgɔ. Siyaw be ben e kɔrɔ.

⁷ Ala, e ka masaya be to seen kan kudayi! I ka masabere ye tilenninya ta ye.

⁸Tilenninya ka d'i ye, juguya man d'i ye. O la, Ala, i ka Ala y'i woloma k'i nisɔn diya ka tɛmɛ i tɔɲɔgɔnw kan.

⁹Tulu kasadiman le b'i ka faniw kan, mire ta, ni alowɛsi ta, ani kanɛli ta. Fɔlikɛminan kandimanw le b'i nisɔn diyara ka bɔ masaso kɔnɔ, masaso min masirinin be ni samaɲin ye.

¹⁰E ka soo kɔnɔ muso dɔw ye masadenw ye. Masamuso lɔnin b'i kinibolo la. A masirinin lo ni sanu yɛrɛ yɛrɛ ye.

¹¹Mɛnni kɛ n fɛ, n denmuso. A filɛ, i tulo malɔ. Ɲinɛ i ka mɔgɔw kɔ, an'i faso.

¹²I koo ka di masacɛ ye i ka cɛɲa kama. Ale y'i matigi ye minkɛ, i kunbiri gwan a kɔrɔ.

¹³Tirikaw bena to ka na boɲafɛnw d'i ma. O nafolotigi nunu bena u seko kɛ janko u koo ka diya i ye.

¹⁴Masacɛ ka kɔɲɔmuso be masaso kɔnɔ n'a ka dawula ye. A kannafani ɲɛgɛnni be ni sanu ye.

¹⁵A kannafani ɲɛgɛɲɛgɛnin lo kosɔbɛ. U be donna n'a ye, ale n'a tɔɲɔgɔn sunguruw.

¹⁶U b'a bilara sira ni nisɔndiyaba ye, a be donna masaso kɔnɔ.

¹⁷Masacɛ, i deenw bena sigi i bɛmaw nɔɔ na. I bena u kɛ ɲamɔgɔw ye diɲɛ yɔrɔ bɛɛ la.

¹⁸Ne bena to k'i koo fɔ waati nata mɔgɔw ye. Mɔgɔw fana bena i tanu kudayi.