Read dyu Dɔnkiliw Ala ye kitabu 46 Bible Online

Dɔnkiliw Ala ye kitabu 46 - dyu bible

Dɔnkiliw Ala ye kitabu 46

¹Dɔnkililabagaw kuntigi ka dɔnkili. Kore kɔmɔgɔw ka dɔnkili dɔ. A be la ni muso kaan ye.

²An dogoyɔrɔ ye Ala ye, a be fanga d'an ma. Dɛmɛbaga lo, min b'an gɛrɛfɛ tuma bɛɛ tɔɔrɔ waati la.

³O la, an te siran, hali ni dugukolo be yɛrɛyɛrɛla, kulu ka bɔn ka taga ben kɔgɔji kɔnɔ pewu,

⁴hali ni jikuruw be mankan kɛ, ka kanga, ka wili sanfɛ, ka kuluw yuguyugu.

⁵Baji dɔ bolo be na ni nisɔndiya ye Ala ka dugu kɔnɔ, min ye Fɛɛn bɛɛ kuntigi ka sigiyɔrɔ ye.

⁶Ala siginin b'a kɔnɔ, a tena ci. Ala be lɔ n'a ka koo ye kabini sɔgɔmadafɛ.

⁷Siyaw be kulera, jamanaw be cira. Ala pɛrɛnna, dugukolo yelenna.

⁸Masaba Setigi be n'an ye. Yakuba ka Ala le y'an dogoyɔrɔ ye.

⁹Masaba ye baara min kɛ, aw k'o filɛ sa! A ye cɛnni min kɛ dugukolo kan, o ye sa!

¹⁰Ale lo be kɛlɛ ban fɔɔ diɲɛ daan na. A be kalaw ni tamanw kari, ka wotorow jɛni.

¹¹Aw y'a dabila. Aw k'a lɔn ko ne le ye Ala ye. N be siyaw mara, n be dugukolo mara.

¹²Masaba Kɛlɛbolotigi be n'an ye. Yakuba ka Ala le y'an dogoyɔrɔ ye.