Read dyu Dɔnkiliw Ala ye kitabu 5 Bible Online

Dɔnkiliw Ala ye kitabu 5 - dyu bible

Dɔnkiliw Ala ye kitabu 5

¹Dɔnkililabagaw kuntigi ka dɔnkili. File le be fɔ a latuma na. Dawuda ka dɔnkili dɔ.

²Masaba, i tulo malɔ ne ka kuma na, ne ŋunankun mɛn.

³Mɛnni kɛ ne ka weleli la, ne ka Masacɛ ni ne ka Ala, ne be ele le daalila.

⁴Sɔgɔmadafɛ i be ne kaan mɛn, Masaba. Sɔgɔma, ne labɛnnin be taga i ɲakɔrɔ k'i makɔnɔ.

⁵Bari i ye Ala ye min te juguya fɛ, kojugukɛla te to e fɛ.

⁶Yɛrɛboɲalaw te se ka to i ɲakɔrɔ, kojugukɛlaw koo man d'i ye.

⁷I be galontigɛla halaki. Mɔgɔfagala ni namaramɔgɔ koo man d'i ye.

⁸Nga i ka ɲumanya ka bon. O le kosɔn, ne be taga i ka soo kɔnɔ. Ne be n ɲaa sin i ka soo ma ka n kunbiri gwan i ɲasiran kosɔn.

⁹Masaba, ne juguw ka ca. Ne dɛmɛ ka taama tilenninya la. E k'i ka sira taamako nɔgɔya ne ye.

¹⁰ Bari mɔgɔ te se ka la u ka fɔta la. Mɔgɔfagako dɔrɔn le b'u kɔnɔ. U gɔnɔ ye kaburu dayɛlɛnin ye, u be mɔgɔw lafili n'u daa ye.

¹¹Ala, u jalaki. A kɛ u be ben u ka kolatigɛnin sababu la, ban u la u ka kojugu caaman kosɔn, bari u murutira i ma.

¹²Mɔgɔ minw b'u yɛrɛ kalifa i ma, olu nisɔn bena diya. U nisɔn bena diya kudayi. Ele bena u tanga. E koo ka di minw ye, u bena nisɔndiya.

¹³Bari ele Masaba be mɔgɔtilennin dɛmɛ. I ka ɲumanya kosɔn, i b'a tanga i ko nigɛkunbɛnnan.