Read dyu Dɔnkiliw Ala ye kitabu 50 Bible Online

Dɔnkiliw Ala ye kitabu 50 - dyu bible

Dɔnkiliw Ala ye kitabu 50

¹Azafu ka dɔnkili dɔ. Ala kumana, Masa Ala kumana. A ye dugukolo mɔgɔw bɛɛ wele, k'a ta kɔrɔn fɛ fɔɔ ka taga se tileben fɛ.

²*Siyɔn min ye duguɲuman ye, Ala be manamana yen i ko tile.

³An ka Ala be nana, a tena je. Tasuma fariman b'a ɲafɛ, sanfɔɲɔba b'a laminina.

⁴A be sankolo ni dugukolo welela janko k'a ka jama kiti.

⁵A ko: «Aw ka ne ka jama lajɛn, minw bɛnna ni ne ye saraka sababu la.»

⁶Sankolo y'a ka tilenninya fɔ ko: «Kititigɛbaga ye Ala le ye.»

⁷«Ne ka jama, aw ye mɛnni kɛ, ne bena kuma. Isirayɛlidenw, ne bena aw ka fili fɔ. Ne ye Ala ye, aw ka Ala.

⁸Ne t'aw jalaki aw ka sarakaw kama dɛ. Aw ka saraka jɛnitaw be ne ɲakɔrɔ tuma bɛɛ.

⁹Ne tena tura minɛ aw fɛ tugu. N tena bakɔrɔninw bɔ aw ka babon kɔnɔ fana.

¹⁰Bari kongosogow bɛɛ ye ne ta ye, kuluw kan sogo caaman nunu ye ne ta ye.

¹¹Ne be kɔnɔw bɛɛ lɔn. Begɛnw ni kongofɛnw bɛɛ ye ne ta ye.

¹²Ni kɔngɔ tun be ne na, ne tun tena o fɔ aw ye do, bari diɲɛ ye ne ta ye, a n'a kɔnɔfɛnw.

¹³Ne be turaw sogo ɲimi wa? Ne be bakɔrɔnin joli min wa?

¹⁴Min ka di n ye, o ye i ka foli saraka bɔ ne Ala ye. E ka jija k'i ka dajuru sara ne Fɛɛn bɛɛ kuntigi ye.

¹⁵I ka ne daali i degun loon na, ne bena i bɔ, e bena ne boɲa.»

¹⁶Nga Ala b'a fɔ mɔgɔjugu ye ko: «Ele min be ne ka sariyaw lɔn ka to k'u fɔ, ele min be to ka an ka bɛɛn koo fɔ, o be mun le ɲa sa?

¹⁷K'a sɔrɔ i be ban ladili la, ka ne ka kuma bila kɔfɛ.

¹⁸E mana soon ye, i b'i niin don ale fɛ. E b'i niin don kakalaw fana fɛ.

¹⁹Kumajugu dɔrɔn le b'i daa la. E ka kuma ye galon dama ye.

²⁰I be to k'i balima kɔrɔfɔ, e b'i baden tɔgɔ cɛn.

²¹E b'o koo le kɛra. Ne jera k'i to. E be miiri ko ne ni ele ye kelen ye. Nga ne bena i jalaki k'i ka kojugu bɛɛ yira i la.

²²Aw minw be ɲinɛ ne Ala kɔ, aw ka ne ka kuma nin faamu ka ɲa. N'o tɛ, n bena aw halaki, mɔgɔ te se ka n bali.

²³Mɔgɔ min ka saraka ye foli ta ye, o tigi le be ne boɲana. Mɔgɔ min be taama ka ɲa, ne Ala bena o tigi le kisi.»