Read dyu Dɔnkiliw Ala ye kitabu 55 Bible Online

Dɔnkiliw Ala ye kitabu 55 - dyu bible

Dɔnkiliw Ala ye kitabu 55

¹Dɔnkililabaga kuntigi ka dɔnkili. Dawuda ka dɔnkili dɔ. Fɔlikɛminan jurulamanw le be fɔ a latuma na.

²Ala, e ka ne ka daali mɛn kosɔbɛ. E kana e yɛrɛ dogo ne la ne ka daalituma na.

³E ka ne lamɛn, ka n jaabi. Ne be munumununa n kunfɛ dusukasi bolo

⁴ne jugu ka mankan ani mɔgɔjugu ka tɔɔrɔ kosɔn. Bari u be ne sigɛnna, u fana be ne jalakira ni dimi ye.

⁵Ne dusu be panpanna, ne siranna kosɔbɛ ko n bena sa.

⁶Ne siranna fɔɔ n be yɛrɛyɛrɛla, ne jaa tigɛra kosɔbɛ.

⁷Fɔɔ n y'a fɔ ko: «Ni gaman tun be n fɛ i ko kɔnɔ, ne tun bena pan ka taga yɔrɔ wɛrɛ la ka lafiɲɛ.

⁸Ne tun bena boli ka taga yɔrɔjan. N tun bena taga to kongokolon kɔnɔ.

⁹Ne tun bena taga sɔgɔsɔgɔ. N tun bena teliya ka dogo sanfɔɲɔba ɲa.»

¹⁰Matigi, u ka koo latigɛninw cɛn. Kan'a to u be kaan kelen fɔ fewu. Bari ne ɲaa be fariyako ni kɛlɛ dama le la dugu nin kɔnɔ.

¹¹O le be kɛra dugu nin kogo kan suu fara tile kan. Sɛgɛn ni makariko le b'a kɔnɔ.

¹²Kojugu dɔrɔn le be kɛra dugu nin faan bɛɛ la. Namara ni ɲɔgɔntɔɲɔ le be feerekɛyɔrɔw la.

¹³Ne tɔgɔ cɛnbaga nin te n jugu ye do. N'a tun kɛra ko ale lo b'o kɛra, n tun b'o muɲu. Min wilinin be ne kama, n kɛlɛbaga tun tɛ do. N'ale tun lo, ne tun bena n yɛrɛ minɛ a la.

¹⁴Nga ele yɛrɛ lo, ne tɔɲɔgɔn, ne teri, n taamaɲɔgɔn.

¹⁵An tun t'an kɔnɔ dogo ɲɔgɔn na. An tun be to ka taga Ala ka soo kɔnɔ ɲɔgɔn fɛ.

¹⁶Ala, a to u ka bari ka sa. U ɲanaman ka taga lahara! Bari kojugu le b'u ka soow n'u yɛrɛ kɔnɔ.

¹⁷Ne be dɛmɛ ɲini Ala fɛ, Masaba bena ne kisi.

¹⁸Ne be ŋunan ka kasi suu fara tile kan. Ale kɔni tulo be n kaan na.

¹⁹A be ne bɔsi u bolo, ka hɛrɛ kɛ n ye, bari, ne kɛlɛbagaw ka ca.

²⁰Ala, e min ye Masa ye kudayi, e ka ne kaan mɛn, k'u mafiɲɛya. Bari u ma yɛlɛma fewu, u te siran e Ala ɲa fewu.

²¹Janfamɔgɔ le be wili a teri kama. A y'a daa di koo min na, a t'o bato.

²²A daa ka di ka tɛmɛ lii kan, nga juguya le b'a kɔnɔ. A ka fɔtaw ka maga ka tɛmɛ tulu kan, nga u ni muru ka kan, min labɛnna cɛnni kama.

²³E k'i ka koow to Masaba bolo, a bena i dɛmɛ. A te mɔgɔɲuman to a be ben abada.

²⁴E Ala, e k'a to u be sa ka kaburu mansɔrɔ. Mɔgɔfagalaw ni namaratɔw lo. E kan'a to u b'u sii tilancɛ yɛrɛ sɔrɔ. Ne kɔni be n yɛrɛ kalifa i ma.