Read dyu Dɔnkiliw Ala ye kitabu 56 Bible Online

Dɔnkiliw Ala ye kitabu 56 - dyu bible

Dɔnkiliw Ala ye kitabu 56

¹ Dɔnkililabagaw kuntigi ka dɔnkili. Dawuda ka dɔnkili dɔ tuma min na filisiw y'a minɛ Gati. U ko min ma «Yɔrɔjan yiribabaw ta.»

²Ee Ala! E ka makari ne la, bari u be ne gwɛnna. Loon o loon, u be ne tɔɔrɔla.

³Loon o loon, ne juguw be n kɛlɛla. Ne kɛlɛbagaw ka ca.

⁴Ni siranya ye n minɛ, ne be n jigi la ele le kan.

⁵Ne be Ala tanu a ka kuma kosɔn. Ne jigi be ele kan, n te siran foyi ɲa. Adamaden be se ka mun le kɛ ne la?

⁶U be ne tɔɔrɔla n'u ka kumaw ye loon o loon. Miiriyajugu le b'u kɔnɔ ne kama.

⁷U be janfa siri ne la, ka ne dɛndɛ. U be tugu n sennɔ kɔ, janko ka n faga.

⁸U jalakibali bena to ten kojugu nin kɛnin kɔ wa? Ala, wili ni dimi ye k'u bugɔ k'u ben duguma.

⁹E be ne ka sɛgɛn kala ma. Ne ɲaji bɔnna cogo min na, i b'o lɔn. O te sɔrɔ i ka sɛbɛ kɔnɔ wa?

¹⁰Loon min na ne bena Ala daali, o loon na, ne juguw bena bɔ ne kɔ. Ne lanin b'a la ko Ala be n fɛ.

¹¹Ne be Ala tanu a ka kuma kosɔn. Ne be Masaba tanu a ka fɔtaw kama.

¹²Ne jigi be Ala kan, ne te siran foyi ɲa. Adamaden be se ka mun le kɛ ne la?

¹³Ala, ne ka kan ka n ka dajuruw sara i ye. Ne bena foli saraka bɔ i ye.

¹⁴Bari i ye ne kisi saya ma. E y'a kɛ ne seen ma talon fana janko ne ka taama e ɲakɔrɔ nimanw cɛma.