Read dyu Dɔnkiliw Ala ye kitabu 59 Bible Online

Dɔnkiliw Ala ye kitabu 59 - dyu bible

Dɔnkiliw Ala ye kitabu 59

¹ Dɔnkililabagaw kuntigi ka dɔnkili. Dawuda ka dɔnkili dɔ tuma min na Sayuli tun ye mɔgɔw bila ka taga a ka soo lamini janko k'a faga, u ko min ma «Kana cɛnni kɛ.»

²Ala, ne bɔsi n juguw bolo, ne kisi n kɛlɛbagaw ma.

³Ne bɔsi kojugukɛlaw bolo, ne kisi mɔgɔfagalaw ma.

⁴U filɛ, u b'u yɛrɛ dogo ne kɛlɛ kama. Mɔgɔ farimanw be ne kɛlɛla. Masaba, n ma kojugu si kɛ, n ma foyi cɛn.

⁵Ne ma kojugu si kɛ, nga u be bolibolila k'u yɛrɛ labɛn. Wili ka na n fɛ, u filɛ sa.

⁶Masaba, Kɛlɛbolotigi, Isirayɛli ka Ala, wili ka siya nunu jalaki. E kana makari mɔgɔjugu janfaci si la.

⁷U be kɔsegi wulafɛ n'u be sɔngɔra i ko wuluw, n'u be to ka dugu munumunu.

⁸Kumajugu le fanin b'u daa la. U ka kuma ka fari i ko muru. Jɔn le bena u lamɛn?

⁹Nga ele Masaba be yɛlɛla u ma. I be yɛlɛla siya wɛrɛ nunu bɛɛ ma.

¹⁰Ne ɲaa be ele le la, ele le ye ne tangabaga ye. Ele Ala le ye ne dogoyɔrɔ ye.

¹¹Ne ka Ala ka ɲi. A bena na ne gɛrɛfɛ. A bena ne juguw halaki n ɲana.

¹²Kana u halaki, janko ne ka jama kana ɲinɛ e ka sebagaya kɔ. I k'u ɲagwan kosɔbɛ, k'u ɲɔti ka ben, Matigi, e min ye an tangabaga ye.

¹³N'u ko u be kuma dɔɔni dɔrɔn, u be don ele gasi la. U ka yɛrɛboɲa ka kɛ sababujugu ye u ma. Bari, galontigɛ ni danga le ye u ka baara ye.

¹⁴E k'u halaki ni dimi ye, u ka tunu pewu. O la, mɔgɔw ben'a lɔn ko e ye Isirayɛlidenw tigi ye fɔɔ o ka taga se diɲɛ daan na.

¹⁵U be kɔsegi wulafɛ n'u be sɔngɔra i ko wuluw, n'u be to ka dugu munumunu.

¹⁶U be yaalayaala yɔrɔ bɛɛ n'u be dumuni ɲinina. N'u ma fa, u be kule.

¹⁷Ne kɔni bena e ka sebagaya dɔnkili la. Ne bena e ka ɲumanya fɔ sɔgɔmadafɛ. Bari ele le ye ne ka yɔrɔ barikaman ye. E ye ne dogoyɔrɔ ye sɛgɛn loon na.

¹⁸Ne ka fanga sɔrɔyɔrɔ, ne b'i tanu. Ele Ala le ye ne ka yɔrɔ barikaman ye. Ala, e ka ɲi tiɲɛ na.