Read dyu Dɔnkiliw Ala ye kitabu 60 Bible Online

Dɔnkiliw Ala ye kitabu 60 - dyu bible

Dɔnkiliw Ala ye kitabu 60

¹Dɔnkililabagaw kuntigi ka dɔnkili. Gɔni le be fɔ a latuma na. Dawuda ka dɔnkili dɔ. Mɔgɔw kalanta.

² A tun ye dɔnkili nin labɛn a kɛlɛtuma ni Mezopotami mara ni Soba ye. O kɔ, Zowabu kɔsegira ka na edɔmuw ka kɛlɛdenw mɔgɔ waa tan ni fila (12 000) kɛlɛ ka se u kɔrɔ kɔgɔ be kɔkɛnɛ min na.

³Ee Ala! I y'an bila, e y'a kɛ an jɛnsɛnna. Hali n'i dimina an kɔrɔ, a to an be lɔyɔrɔ sɔrɔ tugu.

⁴I ye dugukolo yuguyugu, k'a kɛ a cicira. A ciyɔrɔ nunu lalaga, bari a te sera ka lɔ tugu.

⁵I y'a kɛ waatigwɛlɛn ser'an ma. I y'an wajibiya ka duvɛn fariman min.

⁶I ye taamasiɲɛ yira i ɲasiranbagaw la janko u ka boli kalatigiw ɲa.

⁷An minw koo ka d'i ye, an bɔsi n'i ka sebagaya ye, an jaabi waasa an ka kisi.

⁸Ka Ala to a ka sigiyɔrɔ senuman na, a y'a fɔ ko: «Ne ye see sɔrɔ. Ne be Sisɛmu dugu tilantilan, ne be Sukɔti kɔkɛnɛ suma.

⁹Galaadi mara ye ne ta ye, Manase mara fana ye ne ta ye. Efarayimu mara kɛra i ko ne ka kɛlɛkɛfugulan, Zuda mara kɛra i ko ne ka masabere.

¹⁰Mowabu mara ye ne ka koyɔrɔ ye, Edɔmu mara ye ne ka sabaraw filiyɔrɔ ye. Ne be kɛlɛ pɛrɛnkan bɔ Filisi jamana kama.»

¹¹Jɔn bena taga ni ne ye edɔmuw fɛ? Jɔn bena u ka dugu barikaman don ne bolo,

¹²ni e Ala tɛ? K'a sɔrɔ i y'an bila, i te tagara kɛlɛ la n'an ka kɛlɛdenw ye tugu.

¹³E k'an dɛmɛ ka juguw kɛlɛ, bari adamaden ka dɛmɛ te foyi ye.

¹⁴Ni Ala be n'an ye, an bena see sɔrɔ, bari ale lo bena an juguw halaki.