Read dyu Dɔnkiliw Ala ye kitabu 66 Bible Online

Dɔnkiliw Ala ye kitabu 66 - dyu bible

Dɔnkiliw Ala ye kitabu 66

¹Dɔnkililabagaw kuntigi ka dɔnkili. «Diɲɛ mɔgɔw bɛɛ, aw ka Ala tanu.

²Aw k'a tanu, aw k'a boɲa ni dɔnkili ye.»

³A fɔ Ala ye ko: «I ka kɛta be mɔgɔ kabakoya. E barika boɲa kama, e juguw b'u majigi i kɔrɔ.

⁴Dugukolo kan mɔgɔw bɛɛ b'u kunbiri gwanna e ɲakɔrɔ. U be dɔnkili lara k'i boɲa, u b'o lara i tɔgɔ boɲa kama.»

⁵Aw ye na k'aw ɲaa la Ala ka kɛtaw kan, a be kabakow kɛ adamadenw ye.

⁶ A y'a kɛ kɔgɔji tigɛra, dugukolo yera, u taamana ka baa tigɛ yɔrɔ janin na. An be nisɔndiya o la.

⁷A be diɲɛ mara a ka sebagaya la tuma bɛɛ. A ɲaa be siyaw kan. Aw kana wili, murutibaga nunu!

⁸Siyaw, aw k'an ka Ala fo. Aw k'aw kaan bɔ k'a tanu.

⁹An be nii na min sababu la, ale te sɔn an be talon.

¹⁰Ala, i y'an sɛgɛsɛgɛ. I y'an sɛgɛsɛgɛ warigwɛ cogo la.

¹¹I y'an don gwɛlɛya la, i ye tɔɔrɔba la an kan.

¹²I y'a kɛ mɔgɔw yɛlɛla an kuun kan n'u ka soow ye. An tɛmɛna tasuma ni jii kɔnɔ, nga e y'an bɔ k'an lafiya.

¹³Ne bena taga saraka jɛnita bɔ e ka soo kɔnɔ, ne bena n ka dajuruw sara,

¹⁴ne ye minw koo fɔ, minw bɔra ne daa la tigitigi.

¹⁵Ne bena begɛn tulɔninw kɛ saraka jɛnita ye i ma. Sagajigiw sisi kasadiman bena yɛlɛ i fɛ, ka turaw ni bakɔrɔninw fara o kan.

¹⁶Aw minw be siran Ala ɲa, aw ye na mɛnni kɛ. A ye min kɛ ne ye, ne bena o fɔ aw ye.

¹⁷Ne y'a daali, n y'a tanu.

¹⁸Ni n kɔnɔ tun ka jugu, Matigi tun tena mɛnni kɛ n fɛ do.

¹⁹Nga Ala ye ne lamɛn, a y'a tulo malɔ n ka daali la.

²⁰Tiɲɛ na, Ala barika, ale min ma ban ne ka daalili la, a ka ɲumanya fana ma ban n faan fɛ.