Read dyu Dɔnkiliw Ala ye kitabu 68 Bible Online

Dɔnkiliw Ala ye kitabu 68 - dyu bible

Dɔnkiliw Ala ye kitabu 68

¹Dɔnkililabagaw kuntigi ka dɔnkili. Dawuda ka dɔnkili dɔ.

²Ala wilila, a juguw jɛnsɛnna, a kɔniyabagaw be boli a ɲa.

³A b'u tunu i ko sisi. Liɲaga be yelen tasuma kɔnɔ cogo min na, mɔgɔjuguw fana be halaki ten Ala ɲakɔrɔ.

⁴Nga mɔgɔtilenninw bena nisɔndiya, u bena nisɔndiya kosɔbɛ Ala ɲakɔrɔ.

⁵Aw ka dɔnkili la Ala ye, aw k'a tanu. Aw k'o kɛ ka sankaba kan sigibaga kunbɛn. A tɔgɔ ko Masaba, aw ka nisɔndiyapɛrɛnkan bɔ a ɲakɔrɔ.

⁶Ka Ala to a ka yɔrɔ senuman na, ale lo ye falatɔ faa ye, ale lo be firiyamuso ka tiɲɛ fɔ.

⁷Ale lo be somɔgɔw di somɔgɔtan ma. A be kasodenw labila, u be nisɔndiya. Murutibagaw dama le be to yɔrɔgwɛlɛn na.

⁸Tiɲɛ na Ala, e bɔtuma i ka jama ɲafɛ kɔni, e taawaati la kongokolon kɔnɔ kɔni,

⁹ dugukolo tun yɛrɛyɛrɛla, sanji nana i kosɔn, Sinayi tigi Ala, Isirayɛli ka Ala.

¹⁰Ala, e y'a kɛ sanji benna ka ɲa. E ka dugukolo tun dɛsɛra, e y'a lakuraya.

¹¹E ka jama sigira yɔrɔ min na, e Ala, ɲumanyatigi le y'u sigi yen, e tun ye yɔrɔ min labɛn sigɛnbagatɔw ye.

¹²Matigi kumana, kibaru diman fɔmusow cayara!

¹³Kɛlɛdenw n'u ɲamɔgɔw be boli, ka boli. Muso minw tora soo, olu be juguw bololafɛnw tilanna.

¹⁴Tubanin gaman mɔnna ni warigwɛ ye, a gamansi be i ko sanu nɛrɛmuguman. Aw bena la ka to wɛɛrɛ kɔnɔ wa? [1]

¹⁵Setigi Ala tun ye masacɛw jɛnsɛn tuma min na, a tun be i ko *sanji siminin benna Salimɔn kulu kan.

¹⁶*Basan kuluw ye kulubabaw ye, o kuun ka ca.

¹⁷Kulu kuun caaman, mun na i be keliya Ala ka kulu kosɔn? Ala y'e min woloma ka sigi yen. Masaba bena to yen kudayi.

¹⁸Ala ka wotoro ye waa caaman ye. Matigi b'u cɛma, a nana n'u ye Yɔrɔ Senuman na ka bɔ Sinayi kulu kan.

¹⁹ I yɛlɛtɔ sanfɛ, i ye dɔw kɛ kasodenw ye. I ye boɲafɛnw sɔrɔ adamadenw fɛ, hali murutibagaw fɛ. Masaba Ala, i ka sigiyɔrɔ be *Siyɔn.

²⁰Barika ka la Matigi ye loon o loon. A be lɔ n'an ka koo ye, an Kisibaga Ala lo.

²¹Ala ye kisibaga Ala ye an fɛ. Cogo be ale Masaba fɛ k'an kisi saya ma.

²²Tiɲɛ na, Ala ben'a juguw kuun ci, jugu minw b'u ka kojugu la.

²³Matigi y'a fɔ ko: «Ne bena kɔsegi n'u ye ka bɔ Basan kulu kan, ne bena kɔsegi n'u ye ka bɔ kɔgɔji jukɔrɔ,

²⁴janko i seen ka don u joli la, i ka wuluw k'u niyɔrɔ nɛmu e juguw joli la.»

²⁵Ala, u y'i taatɔ ye sebagaya la. I taatɔ yera i ka Yɔrɔ Senuman na, ne ka Ala ni ne ka Masacɛ.

²⁶Dɔnkililabagaw le be ɲafɛ, fɔlikɛlaw be tugura kɔfɛ. Cɛmancɛ la, o ye sunguruninw ye minw be dundunw gosira.

²⁷Aw ye barika la Ala ye ɲɔgɔnlajɛnyɔrɔ la, aw minw ye Isirayɛli buruju ye.

²⁸Bɛnzamɛn min ye u dɔgɔ ye, ale kɔmɔgɔw le be ɲafɛ. O kɔ, Zuda kɔmɔgɔw ɲamɔgɔw tugura, dakamana fani b'u kaan na, ani Zabulɔn kɔmɔgɔw ɲamɔgɔw, ni Nɛfutali taw.

²⁹Ne ka Ala, dɔ fɔ, ka kɛɲɛ n'i ka setigiya ye, i ka setigiya min ye koo caaman ɲa an ye.

³⁰K'i to i ka soo kɔnɔ, min be Zeruzalɛmu kunna, masacɛw bena na n'u ka boɲafɛnw ye i fɛ yen.

³¹Ezipiti bagabaga dɛ, min be i ko badala biin kɔnɔ sogojugu. Siya nunu bagabaga, minw be i ko misiw n'u deenw. O mɔgɔ nunu b'u yɛrɛ majigi ka warigwɛ di. Siya minw be kɛlɛ kanu, u yɛrɛkɛ pewu!

³²Mɔgɔbabaw be nana ka bɔ Ezipiti. Etiyopikaw y'u bolo wili Ala faan fɛ.

³³Dugukolo kan masaw, aw ka dɔnkili la ka Ala boɲa. Aw ka Matigi tanu.

³⁴Jɔn le be ŋunuŋununa fɔɔ sankolo sanfɛ? A b'a ka mankan barikaman kɛra.

³⁵I k'a lɔn ko Ala le be se. A ka kuntigiya be Isirayɛli kan, a ka setigiya be sankaba sanfɛ.

³⁶Ala, i ye siranyafɛn ye, k'i to i ka sigiyɔrɔ la. Ele, Isirayɛli ka Ala be fanga ni setigiya d'i ka jama ma. Ala barika!