Read dyu Dɔnkiliw Ala ye kitabu 69 Bible Online

Dɔnkiliw Ala ye kitabu 69 - dyu bible

Dɔnkiliw Ala ye kitabu 69

¹Dɔnkililabagaw kuntigi ka dɔnkili, u ko min ma «Feeren.» Dawuda ka dɔnkili dɔ. Gɔni le be fɔ a latuma na.

²Ala, ne kisi, ne be tununa jii kɔnɔ!

³Ne be jigira bɔgɔ kɔnɔ, lɔyɔrɔ te n fɛ. Ne be jigira jiba kɔnɔ, a be tagara ni n ye.

⁴Ne ye weleli kɛ ka dɛsɛ fɔɔ ne kaan nagara. Ne ye n ka Ala sira filɛ ka dɛsɛ.

⁵ Ne kɔniyabagaw ka ca ni n kunsigi ye, k'a sɔrɔ kuun t'a la. Ne juguw ye galon la ne kan. U b'a fɛ ka ne faga. U ka kɛnɛ kosɔbɛ. Ne tun ma fɛɛn minw ta, u ye ne wajibiya k'olu di.

⁶Ala, e be ne ka nalomanya lɔn, ne ka kokolonw te dogo i ma.

⁷Mɔgɔ minw jigi b'i kan, Matigi, Masaba, Setigi, ne t'a fɛ ka kɛ sababu ye olu ka maloya ne kosɔn. Minw fana b'i ɲinina, Isirayɛli ka Ala, ne t'a fɛ olu kuun be surun ne kosɔn.

⁸Bari ne be dɔgɔya muɲu ele kosɔn, maloya ye ne kuun surun.

⁹Ne balimaw te ne lɔnna tugu. Ne kɛra lonan ye n badenw fɛ.

¹⁰ E ka soo hami be ne tɔɔrɔ n dusu la kosɔbɛ. E nɛnibagaw ka nɛnili be sera ne ma.

¹¹Ni ne ye suun don janko ka n yɛrɛ majigi, u be ne mafiɲɛya o kosɔn.

¹²Ni ne ye dusukasifani don, u be yɛlɛ ne ma.

¹³Dugu ɲamɔgɔw be ne kɔrɔfɔ, dɔrɔminbagaw be dɔnkili lara ne kan.

¹⁴Nga ne be ele Masaba le daali, e k'i ɲaɲuman yira ne la. Ala, e ka ɲumanya ka bon. Ne jaabi bari i be kisili kɛ tiɲɛ na.

¹⁵Ne bɔ bɔgɔ la, kan'a to ne be tunu a kɔnɔ. Ne bɔsi n kɔniyabagaw la, ne bɔsi jiba la.

¹⁶Kan'a to jii be taga ni n ye. Kan'a to ne be tunu jiba kɔnɔ. Kan'a to kaburu be datugu n kan.

¹⁷Masaba, ne jaabi, e ka ɲi, e be hinɛ. I ɲasin ne ma i ka makariba kosɔn.

¹⁸Kan'i yɛrɛ dogo i ka baarakɛla la. Ne be gwɛlɛya la, ne jaabi sisan yɛrɛ.

¹⁹Gwɛrɛ ne la ka ne kisi, ne bɔsi n juguw bolo.

²⁰Dɔgɔya ni nɛnili ani maloya min be ne kan, i b'o lɔn. E ɲaa be ne juguw bɛɛ la.

²¹Nɛnili ye ne dusu kasi, ne jigi tigɛra. Ne ye hinɛtigi makɔnɔ ka dɛsɛ. N ye jigitugubaga ɲini, n m'a sɔrɔ.

²² U ye baga don ne ka dumuni na. Minnɔgɔ tun be n na, u ye vinɛgiri le di n ma.

²³ U ka dumuni ka kɛ jaan ye u fɛ. A ka kɛ u minɛjɔ ye.

²⁴U ɲaaw ka dibi, u kana yeli kɛ tugu. U kɔɔ ka kuru tuma bɛɛ.

²⁵E ka dimi bɔ u la. A to u k'i ka dimi fariya lɔn.

²⁶ U ka sigiyɔrɔ ka halaki pewu, mɔgɔ si kana sigi u ka soow kɔnɔ tugu.

²⁷E bolo sera mɔgɔ min ma, u be ale lo tɔɔrɔla. U b'a ka tɔɔrɔw kɛ baro ye.

²⁸U ka kojuguw bɛɛ jati minɛ, kan'a to u be kisi.

²⁹ A to u tɔgɔ be jɔsi ka bɔ mɔgɔ ɲanamanw ka sɛbɛ kɔnɔ. Kana u jati mɔgɔtilenninw cɛma.

³⁰Ne ye dɛsɛbagatɔ ye, ne sigɛnnin lo. Ele Ala, ne kisibaga bena ne bɔ o la.

³¹Ne bena Ala tanu ni dɔnkili ye. Ne ben'a makiri n ka tanuli kɔnɔ.

³²O le ka di Masaba ye. O tɛmɛna misi saraka kan, o tɛmɛna tura kɔgɔnin yɛrɛ ta kan.

³³U be minw tɔɲɔna, olu bena o ye ka nisɔndiya. Aw minw be siran Ala ɲa, Ala ka sii d'aw ma.

³⁴Bari Masaba be mɛnni kɛ sigɛnbagatɔw fɛ. A t'a mako bɔ a ka mɔgɔw la minw be kaso la.

³⁵Sankolo ni dugukolo kan fɛɛnw k'a tanu, kɔgɔji n'a kɔnɔfɛnw bɛɛ k'a tanu.

³⁶Bari Ala be *Siyɔn dugu kisi, a bena Zuda mara duguw lɔ tugu. A ka jama bena u minɛ ka sigi yen tugu.

³⁷U bena kɛ a ka baarakɛlaw kɔmɔgɔw niyɔrɔ ye. U bena kɛ a kanubagaw ka sigiyɔrɔ ye.