Read dyu Dɔnkiliw Ala ye kitabu 7 Bible Online

Dɔnkiliw Ala ye kitabu 7 - dyu bible

Dɔnkiliw Ala ye kitabu 7

¹Dawuda ka dɔnkili, a ye min la Matigi ye Bɛnzamɛn kɔmɔgɔ Kusi kosɔn.

²Masaba, n ka Ala, ne be n yɛrɛ kalifa i ma. Ne kisi, ne bɔsi n tɔɔrɔbagaw bɛɛ bolo

³janko u kana ne faranfaran i ko jara b'a kɛ cogo min na. A mana fɛɛn minɛ, mɔgɔ te yen k'a bɔsi.

⁴Masaba n ka Ala, ni ne y'o koo kɛ tiɲɛ na, ni ne ye kojugu dɔ kɛ,

⁵bɛɛn be ne ni mɔgɔ min cɛ, ni ne ye kojugu kɛ ale la, ni ne ye n jugu bololafɛnw cɛ ni kuun t'a la,

⁶i k'a to n jugu ka n gwɛn ka n sɔrɔ, a ka n minɛ ka n tereke duguma, a ka n majigi duguma tɛtɛtɛ.

⁷Masaba, i diminin ka wili! Wili n juguw kama, minw fununa dimi fɛ. E min be tilenninya kɛ, e ka dɔ kɛ.

⁸Jama ka lajɛn k'i lamini. K'i to i ka masasigilan kan, to u kunna.

⁹Masaba, ele lo ye siyaw kitibaga ye. Ne ka kan ni min ye, o kɛ n ye. I k'o kɛ k'a kɛɲɛ ni ne ka tilenninya, ni n ka ɲumanya ye.

¹⁰A to mɔgɔjugu ka juguya dabila, mɔgɔtilenninw ka fanga sɔrɔ, tilenninyatigi Ala, e min be mɔgɔ ka miiriya n'a kɔnɔnako lɔn.

¹¹Ne tangabaga ye ele Ala le ye. I be mɔgɔtilennin kisi.

¹²Ala ye kititigɛla tilennin ye, a be se ka dimi loon bɛɛ.

¹³Ni mɔgɔjugu ma yɛlɛma abada, a b'a ka murujan daa diya, a b'a ka kala labɛn fana.

¹⁴A be mɔgɔfagafɛn labɛnna, a b'a ka biɲɛ labɛnna k'a fariya.

¹⁵A filɛ, mɔgɔjugu b'a la k'a ka baarajugu labɛn. A be miiri kojugu la, o la, a fana be kokolon kɛ.

¹⁶A be dingɛ daa bɔ k'a sogi. A be dingɛ min sogi, a bena ben o le kɔnɔ.

¹⁷A ka kojugu doni bena la a yɛrɛ kunna, a b'a ka fariya sara sɔrɔ.

¹⁸Ne bena Masaba tanu a ka tilenninya kama. Ne bena Fɛɛn bɛɛ kuntigi Masaba tanu.