Read dyu Dɔnkiliw Ala ye kitabu 72 Bible Online

Dɔnkiliw Ala ye kitabu 72 - dyu bible

Dɔnkiliw Ala ye kitabu 72

¹Masacɛ Solomani ka dɔnkili dɔ. Ala, a to masacɛ ka se kititigɛ la i ko ele. A to a ka tilenninya kɛ i ko ele.

²A ka se k'i ka jama kiti ni tilenninya ye, a ka se ka dɛsɛbagatɔw ka tiɲɛ fɔ.

³Hɛrɛ ni tilenninya ka kɛ kuluw ni tintinw bɛɛ kan.

⁴Masacɛ ka kɛ dɛsɛbagatɔw ka tiɲɛ fɔbaga ye. A ka kɛ fantanw kisibaga ye, a k'u tɔɔrɔbagaw halaki.

⁵Ka tile ni kalo to n'u be bɔ kɔni, olu n'u kɔmɔgɔw bena siran i ɲa.

⁶Masacɛ ka kɛ i ko sanjiba be ben cogo min na dugukolo kan. A ka kɛ i ko sanmusumusu, foro kɔnɔ.

⁷Mɔgɔtilenninw bena hɛrɛ sɔrɔ a ka tile la. Hɛrɛ bena kɛ yen kosɔbɛ fɔɔ ni kalo te bɔ tugu.

⁸ A ka kɛ kuntigi ye k'a ta kɔgɔji faan dɔ la fɔɔ faan wɛrɛ la, k'a ta Efarati baji la fɔɔ diɲɛ daan na.

⁹Kongokolon siyaw bena u kunbiri gwan a kɔrɔ, a juguw bena buguri mugan.

¹⁰Tarisisi masacɛ ni kɔgɔji cɛma jamana taw bena na ni boɲafɛnw ye a fɛ. Saba masacɛ ni Seba ta bena nilifɛnw d'a ma.

¹¹Masacɛw bɛɛ bena u kunbiri gwan a kɔrɔ, siyaw bɛɛ bena baara kɛ a ye.

¹²Fantan min be kasi, a bena ale bɔsi, ka dɛsɛbagatɔ bɔsi fana, dɛmɛbaga te min na.

¹³A bena makari barikatan na, ani fantan. A bena fantan kisi.

¹⁴A bena u tanga benkannikɛlaw, ni mɔgɔ farimanw ma. U nii koo ka gwɛlɛ a ma.

¹⁵A to masacɛ ka sii sɔrɔ! Sanu ka d'a ma ka bɔ Saba. Daalili ka kɛ a ye tuma bɛɛ. Duba ka kɛ a ye loon bɛɛ.

¹⁶A to suman ka ɲa jamana yɔrɔ bɛɛ, suman tisan ka sɔrɔ kuluw kan. U ka ɲa i ko Liban kuluw ta. K'a ta dugu kɔnɔ, jamana yɔrɔ bɛɛ ka kɛ binkɛnɛ ye.

¹⁷Masacɛ tɔgɔ ka to yen kudayi, a tɔgɔ ka to waati bɛɛ i ko tile. Siyaw bɛɛ ka Ala daali ko a ka olu ta ɲa i ko a ye masacɛ ta ɲa cogo min na.

¹⁸Barika, Masa Ala, Isirayɛli ka Ala, e kelen le be kabakow kɛ.

¹⁹Ne b'i fo tuma bɛɛ, Nɔɔrɔtigi Ala, a to i ka nɔɔrɔ ka ye dugukolo yɔrɔ bɛɛ la. Amiina yarabi.

²⁰Zese dencɛ Dawuda ka daaliliw banna yan.