Read dyu Dɔnkiliw Ala ye kitabu 74 Bible Online

Dɔnkiliw Ala ye kitabu 74 - dyu bible

Dɔnkiliw Ala ye kitabu 74

¹Azafu ka dɔnkili dɔ. Ala, mun na e y'an bila sa? Mun na e dimina i ka sagakulu kɔrɔ?

²I hakili to i ka jama na, e ye min kɛ i yɛrɛ ta ye koow daminɛ na. E niyɔrɔ siya lo, e y'i janto min na. I hakili to *Siyɔn kulu la, e ka sigiyɔrɔ.

³Wili ka taga tomoyɔrɔ nin na. Jugu ye fɛɛn bɛɛ cɛn i ka yɔrɔ senuman na.

⁴E juguw tun pɛrɛnna i ka sigiyɔrɔ la. U y'u ka taamasiɲɛ bila yen.

⁵U y'u yɛrɛ yira i ko yiritigɛlaw, minw ka jende labɛnnin bɛ tuu tigɛli kama.

⁶U ye jaa dilannin nunu bɛɛ cɛn. U y'u cɛn ni jende ani marito ye.

⁷U y'i ka yɔrɔ jɛni, u y'i ka sigiyɔrɔ ci k'a nɔgɔ.

⁸U tun y'a fɔ ko: «An k'u lamaga kosɔbɛ!» U ye Ala batoyɔrɔw bɛɛ jɛni jamana kɔnɔ.

⁹An ɲaa t'i taamasiɲɛ yera tugu, kira te yera fana. Mɔgɔ fana t'an cɛma min b'o koo banwaati lɔn.

¹⁰Ala, an tɔɔrɔbagaw bena u ka ɲadonya dabila tuma jumɛn? Juguw bena to k'i dɔgɔya ten kudayi wa?

¹¹Mun na i te wili ka dɔ kɛ? E y'i bolo to i yɛrɛ kan ten.

¹²Ala, ele le ye ne ka Masa ye kabini fɔlɔfɔlɔ. Ele le be kisili kɛ jamana nin kɔnɔ.

¹³ I ye kɔgɔji cɛtigɛ i ka fangatigiya barika la. I ye sogojugu kuun ci.

¹⁴ I ye sogojugu Leviyatan kuun ci k'a di kongosogow ma.

¹⁵Ele le y'a kɛ jii be bɔ dugukolo kɔnɔ ka kɛ kɔɔ ye. Ele le be baa kɛ a jii be ban ka sɔrɔ a tun te ja.

¹⁶Tile y'i ta ye, suu fana y'i ta ye. Ele le ye kalo ni tile dan.

¹⁷Ele le ye dugukolo daan bɔ. Ele le ye samiɲa ni tilemana sigi.

¹⁸E k'i hakili to nin na: Juguw ye ele Masaba tɔgɔ cɛn, siya naloman dɔ b'i dɔgɔyara.

¹⁹Kana i ka tuganin di kongosogo ma a k'a faga. Kana ɲinɛ i ka sigɛnbagatɔw kɔ kudayi.

²⁰I janto i ka layidu la. Benkanniko le fanin be jamana logologow kɔnɔ.

²¹Kan'a to ɲanibagatɔ be kɔsegi ni maloya ye. A to sigɛnbagatɔ ni fantanw k'i tanu.

²²Ala, wili, kan'i ka koo to a be cɛn. Nalomanw be dɔgɔya min kɛr'i la loon o loon, e k'i hakili to o la.

²³I hakili to i juguw ka mankan na. Mɔgɔ minw wilila i kama, olu be mankan banbali kɛ.