Read dyu Dɔnkiliw Ala ye kitabu 76 Bible Online

Dɔnkiliw Ala ye kitabu 76 - dyu bible

Dɔnkiliw Ala ye kitabu 76

¹Dɔnkililabagaw kuntigi ka dɔnkili. Fɔlikɛminan jurulaman le be fɔ a latuma na. Azafu ka dɔnkiliw dɔ Ala ye.

²Ala y'a yɛrɛ yira Zuda mara la. A tɔgɔ bɔra kosɔbɛ Isirayɛlidenw fɛ.

³A ka soo be Salɛmu dugu kɔnɔ, [1] a ka sigiyɔrɔ be *Siyɔn dugu kɔnɔ.

⁴A ye kɛlɛkɛminanw cɛn o yɔrɔ le la. A ye biɲɛw, ni murujanjanw ani nigɛkunbɛnnanw cɛn yen.

⁵Boɲa ni nɔɔrɔ b'i kan ka tɛmɛ kulubabaw kan.

⁶Kɛlɛdenŋana nunu bololafɛnw bɔsira. U sinɔgɔra, u tena kunun tugu. Cɛfari nunu ma se k'u yɛrɛ tanga.

⁷Yakuba ka Ala, i ye bagabagali kɛ, soow n'u bolibagaw kirinna ka lɔ.

⁸Ele le ye siranyafɛn ye. Ni ele dimina, jɔn be se ka lɔ i ɲa?

⁹K'i to sankolo kɔnɔ, i ye kiti tigɛ. Yɔrɔ sumana tɔntɔn dugukolo kan siranya bolo

¹⁰tuma min na e Ala wilila ko i be kiti tigɛ, ka dɛsɛbagatɔw bɛɛ kisi dugukolo kan.

¹¹Hali mɔgɔ minw diminin lo, e b'a kɛ olu b'i tanu. Minw sera ka kisi o dimi ma, e be olu nɔrɔ i la.

¹²Aw k'aw daa di Masaba aw ka Ala ma, aw k'o dajuru sara fana. Aw ka na ni boɲafɛnw ye, aw minw bɛɛ b'a lamini na, a ye na n'o ye Ala fɛ min be mɔgɔ siran.

¹³Ɲamɔgɔ minw b'u yɛrɛ boɲa, a b'u majigi. A be siranya bila masacɛw la kosɔbɛ.