Read dyu Dɔnkiliw Ala ye kitabu 77 Bible Online

Dɔnkiliw Ala ye kitabu 77 - dyu bible

Dɔnkiliw Ala ye kitabu 77

¹Dɔnkililabagaw kuntigi ka dɔnkili. Yedutun ka dɔnkili. Azafu ka dɔnkili dɔ.

²Ne be kasira Ala nɔɔ fɛ. Ne be kasira Ala nɔɔ fɛ, a bena ne lamɛn.

³Ka ne to dusukasi la, n ye Matigi ɲini. Sufɛ ne be n bolo kɔrɔta k'a daali, n te sigɛn o la, nga ne dusu te saalola.

⁴Ni ne hakili jigira Ala la, ne be ŋunan. Ni n miirila dɔrɔn, n hakili be ɲagami.

⁵E b'a kɛ sinɔgɔ te na n ɲaa na fewu. Ne hakili ɲagamina, ne te se ka foyi fɔ tugu.

⁶Ne be miiri fɔlɔfɔlɔ waati, an'u saanw la.

⁷Ne be suu bɛɛ kɛ miiri la. N be miiri kosɔbɛ ka n yɛrɛ ɲininga ko:

⁸«Matigi y'an bila pepewu le wa? An koo tena diya a ye tugu wa?

⁹A ka ɲumanya banna wa? A tena kuma an fɛ tugu fewu fewu wa?

¹⁰Ala ɲinɛn'a ka hinɛ kɔ le wa? Dimi kosɔn, a te sɔn ka makari an na tugu wa?»

¹¹Ne ko: «Fɛɛn bɛɛ kuntigi t'an dɛmɛna tugu, o le be digi ne la.»

¹²Ne hakili b'i ka kɛtaw la, Masaba, ne hakili be i ka fɔlɔfɔlɔ kabakow la.

¹³Ne be miiri i ka kɛwaliw bɛɛ la, n be miiri i ka kobabaw bɛɛ la.

¹⁴Ala, i ka sira kɔni saniyanin lo. Batofɛn si te yen min ka bon k'i bɔ.

¹⁵Ele Ala le be kabakow kɛ. E b'i ka sebagaya yira siyaw cɛma.

¹⁶E y'i ka jama bɔsi n'i ka setigiya ye, jama min ye Yakuba n'a deen Yusufu kɔmɔgɔw ye.

¹⁷Ala, tuma min na jiiw y'i ye, u yɛrɛyɛrɛla. Jibaw yuguyugura fɔɔ u jukɔrɔ.

¹⁸Sankabaw wilila, sanji benna kosɔbɛ. Saan fana tora ka pɛrɛn, ani ka manamana faan bɛɛ la.

¹⁹Saan pɛrɛnna minkɛ, sanmanamana ye diɲɛ bɛɛ labɔ. Dugukolo yɛrɛyɛrɛla kosɔbɛ.

²⁰I y'i ka sira bɔ kɔgɔji cɛma, jiba kɔnɔ kɛra i ka tɛmɛyɔrɔ ye, e tɛmɛnɔ ma ye tugu.

²¹E y'i ka jama bila sira i ko sagakulu. E y'o kɛ Musa ni Arɔn barika la.