Read dyu Dɔnkiliw Ala ye kitabu 79 Bible Online

Dɔnkiliw Ala ye kitabu 79 - dyu bible

Dɔnkiliw Ala ye kitabu 79

¹ Azafu ka dɔnkili dɔ. Ala, siya wɛrɛw y'i ka sigiyɔrɔ minɛ. U y'i ka soo nɔgɔ, u ye Zeruzalɛmu kɛ tomo ye.

²U y'i ka baarakɛlaw faga k'u fili, u y'u suuw kɛ kɔnɔw ka dumuni ye. U y'i ka jama faga k'u fili kongosogow ye.

³U y'u joli kɛ Zeruzalɛmu lamini na i ko jii. Sutarabaga ma sɔrɔ u la.

⁴An kɛra an sigiɲɔgɔnw ka nɛnifɛnw ye. Minw b'an lamini na, olu b'an jagabɔ.

⁵Masaba, i ka dimi nin bena ban tuma jumɛn? O min be yen kudayi. I ka keliya min be i ko tasuma, o bena ban tuma jumɛn?

⁶I ka dimi yira siya wɛrɛw la, minw t'i lɔn. A yira jamana wɛrɛ mɔgɔw la, minw t'i bato.

⁷Bari u ye Isirayɛlidenw halaki, u y'u ka sigiyɔrɔ cɛn.

⁸Kana i hakili to an ka fɔlɔ filiw la. E ka makari an na joona joona, bari an barika banna.

⁹An Kisibaga Ala, an dɛmɛ e tɔgɔ boɲa kama. E ka boɲa kama, e k'an bɔsi k'an ka filiw yafa.

¹⁰Mun na i ben'a to siya wɛrɛw b'a fɔ ko: «U ka Ala be min?» U halaki, k'i ka jama fagako juru sara. A to o ka kɛ an ɲana.

¹¹I ka kasodenw kasikan mɛn. Minw be ɲini ka sa, e k'olu kisi e ka sebagaya barika la.

¹²An lamini siyaw ye dɔgɔya min kɛ i la, Matigi, e k'o ɲɔgɔn wolonwula kɛ u la.

¹³Nga an kɔni, an minw y'i ka jama ye, an minw y'i ka sagakulu ye, an bena i tanu kudayi. An bena i tanu saan o saan waati nataw la.