Read dyu Dɔnkiliw Ala ye kitabu 81 Bible Online

Dɔnkiliw Ala ye kitabu 81 - dyu bible

Dɔnkiliw Ala ye kitabu 81

¹Dɔnkililabagaw kuntigi ka dɔnkili. Azafu ka dɔnkili dɔ. Gatikaw ka gɔni le be fɔ a latuma na.

²Aw ka nisɔndiyapɛrɛnkan bɔ Ala ye, ale min be fanga di an ma. Aw ka dɔnkili la Yakuba ka Ala ye.

³Aw ka fɔli kɛ, aw ye dundun fɔ. Aw ye gɔni ani kolonjo kandimanw fɔ.

⁴ Aw ka buru fiyɛ kalokura la. Aw k'a fiyɛ kalo nin gwɛtuma na fana, aw ka ɲanagwɛ loon nin na.

⁵O ye sariya ye Isirayɛlidenw fɛ, u ka Ala ka kolatigɛli lo.

⁶O ye sariya ye a ye min sigi Yusufu ka somɔgɔw ye, tuma min na a tun wilila Ezipiti jamana kama. Ne ye kaan dɔ mɛn n te min lɔn.

⁷A ko: «Ne ye doni jigi ka bɔ aw gaman kan. Ne y'a kɛ aw ye biriki doni bila.

⁸ K'aw to dusukasi la, aw kasira ne kɔ, ne y'aw bɔsi. Ne y'aw jaabi sanpɛrɛn kɔnɔ. Ne y'aw kɔrɔbɔ Meriba jii daa la.

⁹Ne ka jama, aw ka mɛnni kɛ, ne ka kan k'aw lasɔmi. Isirayɛlidenw, n'aw tun be sɔn ka ne lamɛn kɔni!

¹⁰ Batofɛn wɛrɛ kana sɔrɔ aw fɛ, aw man kan ka lonanw ka batofɛn bato.

¹¹Ne Masaba aw ka Ala le y'aw bɔ Ezipiti jamana na. Aw k'aw daa yɛlɛ kosɔbɛ, ne ben'a fa.»

¹²Nga ne ka jama ma mɛnni kɛ ne fɛ, Isirayɛlidenw banna ne la.

¹³O la, ne y'u to u ka tulogwɛlɛya la. U tora k'u yɛrɛ diyanakow kɛ.

¹⁴Tiɲɛ na, ni ne ka jama tun ye mɛnni kɛ ne fɛ kɔni, ni Isirayɛlidenw tun ye ne ka fɔta bato,

¹⁵ne tun bena u juguw majigi yɔrɔnin kelen, ne tun bena n bolo wili u kɛlɛbagaw kama.

¹⁶Masaba kɔniyabagaw bɛɛ bena biri a ɲafɛ. O le bena kɛ u ka latigɛ ye tuma bɛɛ.

¹⁷A bena Isirayɛlidenw balo ni suman ɲanaman ye. A bena u balo ni yiriwo lii ye.