Read dyu Dɔnkiliw Ala ye kitabu 86 Bible Online

Dɔnkiliw Ala ye kitabu 86 - dyu bible

Dɔnkiliw Ala ye kitabu 86

¹Dawuda ka dɔnkili dɔ. Masaba, mɛnni kɛ ne fɛ, n jaabi, bari ne ye fantan ye, ne dɛsɛnin lo.

²Ne tanga saya ma, bari n ye n yɛrɛ d'i ma. Ele ye ne ka Ala ye, e ka baarakɛla kisi, ne jigi b'i kan.

³Matigi, makari ne la, ne be kasi ele le kɔ loon bɛɛ.

⁴E ka baarakɛla nisɔndiya, bari ne ka daalili sinnin be ele Matigi lo ma.

⁵Matigi, e ka ɲi, e be yafa. E be ɲumanya kɛ i daalibagaw ye kosɔbɛ.

⁶Masaba, i tulo malɔ ne ka daalikan na. Mɛnni kɛ ne ka makaritɔkan na.

⁷Ne b'i daali n ka dusukasi loon na, bari e be ne jaabi.

⁸Matigi, e bɔɲɔgɔnko batofɛn te yen. Foyi ka kɛwali bɔnin te i ta ma.

⁹ I ye siya minw dan, olu bena na u kunbiriw gwan ele Matigi ɲakɔrɔ k'i tɔgɔ boɲa.

¹⁰Bari e ka bon, i be kabakow kɛ. E kelen le ye Ala ye.

¹¹Masaba, i ka sira yira ne la. Ne bena i ka tiɲɛko kɛ. Kɔnɔgwɛ di ne ma, n ka siran i ɲa.

¹²Ne bena i bato ni kɔnɔgwɛ ye, Matigi ne ka Ala. Ne bena to ka boɲa la i tɔgɔ kan kudayi.

¹³Bari e ka ɲumanya ka bon ne faan fɛ, e be ne kisi kaburu ma.

¹⁴Ala, yɛrɛboɲabagaw wilila ne kama, mɔgɔ fariman dɔw b'a fɛ ka ne faga. U te miiri ele la fewu.

¹⁵Nga Matigi, e kɔni ye Ala ye, i be makari, i be hinɛ. E te dimi joona, e ka ɲumanya ka bon, e ye kantigi ye fana.

¹⁶E ɲaa yɛlɛma ne faan fɛ ka makari ne la. Barika don ne, i ka baarakɛla la. I ka baarakɛmuso deen le ye ne ye, ne kisi.

¹⁷Taamasiɲɛ dɔ kɛ k'a yira ko i be ne fɛ. Ne kɔniyabagaw bena o ye, u bena maloya, bari e Matigi le ye ne dɛmɛbaga ni ne jigitugubaga ye.