Read dyu Dɔnkiliw Ala ye kitabu 9 Bible Online

Dɔnkiliw Ala ye kitabu 9 - dyu bible

Dɔnkiliw Ala ye kitabu 9

¹Dɔnkililabagaw kuntigi ka dɔnkili, u ko min ma «Dencɛ ka saya.» Dawuda ka dɔnkili dɔ.

²Masaba, ne bena e tanu ni n dusu bɛɛ ye. Ne bena e ka ɲumanya bɛɛ fɔ.

³Ne bena nisɔndiya i koo la ka ɲanagwɛ. Ne bena i tanu, Fɛɛn bɛɛ kuntigi.

⁴Ne juguw be boli i ɲa tuma min na, u be talon ka halaki.

⁵Bari e lɔra ni ne ka koo ye k'o ɲanabɔ. K'i to i ka masasigilan kan, e be kiti tilennin tigɛ.

⁶I be siyaw bagabaga ka kojugukɛlaw halaki, i b'u tɔgɔ tunu pewu.

⁷Juguw halakira, u ta cɛnna pepewu. I ye dugu minw halaki, mɔgɔ hakili te olu la tugu.

⁸Masaba ye faama ye kudayi, a y'a ka masasigilan labɛn kiti kama.

⁹Ale lo be diɲɛ mɔgɔw mara ni tilenninya ye, a be siyaw kiti ni tilenninya ye.

¹⁰Masaba ye sigɛnbagatɔw dogoyɔrɔ ye. U dogoyɔrɔ lo dusukasi tuma na.

¹¹Mɔgɔ minw b'i lɔn, olu b'u yɛrɛ kalifa i ma, bari ele Masaba t'i yɔrɔ ɲinibaga bila abada.

¹²Aw ka tanuli dɔnkili la Masaba ye, ale min be *Siyɔn dugu kɔnɔ. Aw k'a ka kobabaw fɔ jama cɛma.

¹³Bari u ye mɔgɔ minw faga, a hakili be olu la, a bena u mɔnɛ bɔ fana. A te ɲinɛ sigɛnbagatɔ ka daalili kɔ.

¹⁴Masaba, ne sigɛnnin filɛ n kɔniyabagaw bolo, e min ye ne bɔsibaga ye saya bolo, makari ne la

¹⁵janko ne ka se k'i tanu kosɔbɛ Siyɔn dugu kɔnɔ, ne ka se ka nisɔndiya n kisiko la, min be sɔrɔ i fɛ.

¹⁶Siyaw ye dingɛ minw sogi, u benna olu le kɔnɔ. U ye jɔɔ minw la dogo la, u minɛna olu le kɔnɔ.

¹⁷Masaba y'a yɛrɛ yira, a be kotilennin kɛ. Mɔgɔjugu ka baarajuguw ben'a yɛrɛ sɔrɔ.

¹⁸Mɔgɔjuguw ka kɔsegi ka taga lahara, olu minw bɛɛ ɲinɛna Ala kɔ.

¹⁹Ala te ɲinɛ fantanw kɔ abada. Sigɛnbagatɔw jigi tena kɛ fuu ye abada.

²⁰Masaba, wili! Kan'a to adamaden be see sɔrɔ, a to siya wɛrɛw ka kiti i ɲakɔrɔ.

²¹Masaba, siranya bila u la. A to siya wɛrɛ nunu k'a lɔn k'u ye adamaden gwansanw ye.