Read dyu Dɔnkiliw Ala ye kitabu 94 Bible Online

Dɔnkiliw Ala ye kitabu 94 - dyu bible

Dɔnkiliw Ala ye kitabu 94

¹Masa Ala, mɔnɛbɔbaga, i yɛrɛ yira Ala, mɔnɛbɔbaga.

²Diɲɛ kitibaga, wili ka yɛrɛboɲalaw sara.

³Masaba, mɔgɔjuguw bena u ka ɲanagwɛ dabila tuma jumɛn? U ben'a dabila tuma jumɛn le?

⁴U be kumababaw fɔra, kojugukɛla nunu bɛɛ b'u yɛrɛ boɲa.

⁵Masaba, u b'i ka jama halakira, u b'i ka mɔgɔw dɔgɔyara.

⁶U be firiyamuso faga, ni lonan, u be falatɔ fana faga.

⁷U b'a fɔra ko: «Masaba te foyi yera do, Yakuba ka Ala te foyi kala ma!»

⁸Nalomanw, aw k'aw yɛrɛ kɔlɔsi. Hakilitanw, aw bena faamuli kɛ waati jumɛn?

⁹Matigi min ye tulo dibaga ye, ale te mɛnni kɛ wa? Ale min ye ɲaa di, a te yeli kɛ wa?

¹⁰Ale min be siyaw ladi, a te se k'u ɲaa gwan wa? Ale min be adamaden kalan, a be se ka dɛsɛ hakili la wa?

¹¹ Masaba be adamaden ka miiriya lɔn. A b'a lɔn k'o kɛra fufafu le ye.

¹²Masaba, e be mɔgɔ min ladi k'i ka sariya yira a la, o tigi dagamunin lo.

¹³A bena lafiɲɛyɔrɔ sɔrɔ sɛgɛn loon na, k'a sɔrɔ dingɛ le be sogira mɔgɔjugu kama.

¹⁴Bari Masaba t'a ka jama bila. A t'a ka mɔgɔw to yen fewu.

¹⁵Tiɲɛ bena fɔ tugu kititigɛyɔrɔw la, mɔgɔ kɔnɔgwɛninw bɛɛ bena tugu o kɔ.

¹⁶Jɔn le bena wili mɔgɔjugu nunu kama ne ye? Jɔn bena mɔgɔkolon nunu kɛlɛ ne ye sa?

¹⁷Ni Masaba tun ma ne dɛmɛ, ne tun bena sa.

¹⁸Tuma min na ne tun ko ne bena ben, Masaba, e ye ne dɛmɛ i ka ɲumanya la.

¹⁹Ne ka haminako tun ka ca kosɔbɛ tuma min na, i ye ne jigi tugu, ne nisɔndiyara.

²⁰E ni ɲamɔgɔjugu nunu bɛnnin lo wa? Minw ka mɔgɔ ɲagwancogo ni sariya te bɛn.

²¹U be bɛn ka mɔgɔtilennin le kɛlɛ, u be mɔgɔ jalakibali le jalaki.

²²Masaba le ye ne dogoyɔrɔ barikaman ye. Ne ka Ala le ye ne tangakabakuru ye, ne be dogo min kɔrɔ.

²³A bena u ka kojuguw juru sara u ye. A bena u halaki u ka kojugu kosɔn. Tiɲɛ na, Masaba an ka Ala bena u halaki.