Read dyu Dɔnkiliw Ala ye kitabu 96 Bible Online

Dɔnkiliw Ala ye kitabu 96 - dyu bible

Dɔnkiliw Ala ye kitabu 96

¹Aw ka dɔnkilikura la Masaba ye. Dugukolo kan mɔgɔw bɛɛ, aw ka dɔnkili la Masaba ye.

²Aw ka dɔnkili l'a ye k'a tɔgɔ boɲa. Aw k'a ka kisili koo fɔ loon o loon.

³Aw k'a ka boɲa fɔ siyaw cɛma. Aw k'a ka koɲumanw fɔ jama bɛɛ ye.

⁴Bari Masaba ka bon, a ka kan ni tanuli ye kosɔbɛ. Siranyafɛn lo ka tɛmɛ batofɛn tɔw bɛɛ kan.

⁵Siyaw ka batofɛn si te foyi ye. Masaba le ye sankolo dan.

⁶Nɔɔrɔ ni boɲa le b'a kan. Sebagaya ni dawula b'a ka sigiyɔrɔ la.

⁷ Jamanadenw bɛɛ, aw ka Masaba boɲa. Aw k'a ka nɔɔrɔ n'a ka setigiya fɔ.

⁸Aw ka Masaba tɔgɔ boɲa. Aw ka na ni boɲafɛnw ye a ka luu kɔnɔ.

⁹Aw k'aw kunbiri gwan a ɲakɔrɔ a ka yɔrɔ senuman na. Dugukolo kan mɔgɔw bɛɛ, aw ka yɛrɛyɛrɛ a ɲa.

¹⁰Aw k'a fɔ siya wɛrɛw cɛma ko: «Masaba ye kuntigi ye.» Diɲɛ sigira ka ɲa, a tena cɛn. Masaba be siyaw kiti ni tilenninya ye.

¹¹Nisɔndiya ka sɔrɔ sankolo la, ɲanagwɛ ka kɛ dugukolo kan. Kɔgɔji n'a kɔnɔnafɛnw bɛɛ ka mankan kɛ.

¹²Kongokɔnɔfɛnw bɛɛ ka ɲanagwɛ. Tukɔnɔyiriw bɛɛ ka nisɔndiyakan bɔ.

¹³O ka kɛ Masaba ɲafɛ, bari a be nana. A be nana dugukolo kan mɔgɔw kiti. A bena diɲɛ kiti ni tilenninya ye, a bena siyaw kiti ka kɛɲɛ n'a ka kantigiya ye.