Read dyu Dɔnkiliw Ala ye kitabu 97 Bible Online

Dɔnkiliw Ala ye kitabu 97 - dyu bible

Dɔnkiliw Ala ye kitabu 97

¹Masaba ye kuntigi ye, dugukolo kan mɔgɔw ka nisɔndiya. Yɔrɔjan mɔgɔw ka nisɔndiya.

²Sankaba ni dibi le b'a laminina. Tilenninya ni tiɲɛ le y'a ka masasigilan lili ye.

³Tasuma b'a ɲa, o b'a juguw jɛni a lamini na.

⁴A ba kɛ saan be manamana ka diɲɛ kɛ yeelen ye, dugukolo be yɛrɛyɛrɛ.

⁵Kuluw be yelen Masaba ɲakɔrɔ i ko liɲaga, diɲɛ bɛɛ ka Matigi ɲakɔrɔ.

⁶Sankolo b'a ka tilenninya yira, siyaw bɛɛ b'a ka boɲa ye.

⁷Josɔnlaw ta ye maloya ye, olu minw jigi fanin lo u kosɔn. Batofɛnw bɛɛ k'u kunbiri gwan Masaba ɲakɔrɔ.

⁸*Siyɔn dugu mɔgɔw y'o mɛn, u nisɔndiyara. Zuda mara duguw ye ɲanagwɛ kɛ, Masaba, i ka kiti la.

⁹Masaba, e Fɛɛn bɛɛ kuntigi kɔni be dugukolo kunna. Ele ka bon ka tɛmɛ batofɛnw bɛɛ kan.

¹⁰Kojugu man di mɔgɔ minw ye, olu le koo ka di Masaba ye. A be olu le mara. A be olu le bɔsi mɔgɔjuguw bolo.

¹¹Yeelen be bɔ mɔgɔtilennin ye. Mɔgɔ kɔnɔgwɛnin be nisɔndiya.

¹²Mɔgɔtilenninw, aw ka nisɔndiya Masaba kosɔn. Aw k'a tɔgɔ senuman tanu.