Read dyu Talenw kitabu 10 Bible Online

Talenw kitabu 10 - dyu bible

Talenw kitabu 10

¹Solomani ka talenw filɛ: Deen hakilitigi b'a facɛ nisɔndiya. Nga deen naloman b'a bamuso dusu kasi.

²Nafa te namarafɛn na. Nga tilenninya be mɔgɔ kisi saya ma.

³Masaba t'a to mɔgɔtilennin be tɔɔrɔ kɔngɔ bolo. Nga a be mɔgɔjugu bali a nigɛlafɛnw na.

⁴Salabagatɔya le be na ni fantanya ye. Nga baara be mɔgɔ nafolotigiya.

⁵Mɔgɔ min be dumuni ɲini a sɔrɔtuma na, o ye deen hakilitigi ye. Nga min be la ka sinɔgɔ suman tigɛtuma na, o ka kan ni dɔgɔya ye.

⁶Duba be mɔgɔtilennin kan. Nga balawu be mɔgɔjugu ka kuma jukɔrɔ.

⁷Mɔgɔtilennin ka koo be to mɔgɔw hakili la. Nga mɔgɔjugu kɔni tɔgɔ be tunu bugubugu.

⁸Hakilitigi be sɔn ladili ma. Nga kuma fufafu fɔbaga be bɔnɛ lase a yɛrɛ ma.

⁹Mɔgɔ min be taama hɔrɔnya la, o tigi ta ka ɲi. Nga mɔgɔ min be taama tilenbaliya la, o tigi bena ye kɛnɛ kan.

¹⁰Mɔgɔ min te tiɲɛ fɔ a tɔɲɔgɔn ye, o b'a tɔɔrɔ. Kuma fufafu fɔbaga be bɔnɛ lase a yɛrɛ ma.

¹¹Mɔgɔtilennin dalakuma be sii di mɔgɔ ma. Nga balawu be mɔgɔjugu ka kuma jukɔrɔ.

¹² Ɲɔgɔnkɔniya be na ni kɛlɛ ye. Nga kanuya sababu la, fili bɛɛ be yafa.

¹³Lɔnniya be sɔrɔ hakilitigi ka kuma kɔnɔ. Nga bere le be sɔrɔ hakilitan kɔɔ kan.

¹⁴Lɔnnikɛlaw be lɔnniya mara. Naloman ka kuma be na ni halakili ye.

¹⁵Nafolotigi ka nafolo ye dugu barikaman ye a fɛ. Fantan ka dɛsɛ be taga n'a ye halakili la.

¹⁶Mɔgɔtilennin ka baara be sii d'a ma. Mɔgɔjugu ta ye juguman ye.

¹⁷Mɔgɔ min be sɔn ladili ma, o tigi be hɛrɛ sira kan. Nga min be ban ladili la, o tigi b'a yɛrɛ tunusira kan.

¹⁸Mɔgɔ min b'a tɔɲɔgɔn kɔniya dogo la, o tigi ye galontigɛla le ye. Min be galon tigɛ ka mɔgɔ tɔgɔ cɛn, o tigi ye naloman le ye.

¹⁹Kuma caaman be na ni fili ye. Min b'a ka fɔta dama kɛɲɛ, o tigi ye hakilitigi ye.

²⁰Mɔgɔtilennin nɛnden be i ko warigwɛ ɲanaman. Mɔgɔjugu ka miiriya te foyi ɲa.

²¹Mɔgɔtilennin ka kuma be jama wasa. Nga nalomanw be sa miiribaliya kosɔn.

²²Masaba ka dɛmɛ be mɔgɔ kɛ fɛntigi ye. Yɛrɛsigɛn te foyi fara sɔrɔta kan.

²³Ka kojugu kɛ, o ye farifoniko ye naloman fɛ. Hakilitigi ta ye lɔnniya ye.

²⁴Mɔgɔjugu be siran fɛɛn min ɲa, o le b'a sɔrɔ. Mɔgɔtilennin kɔnɔnako bena kɛ a ye.

²⁵Ni gwɛlɛya nana, mɔgɔjugu be tunu. Nga mɔgɔtilennin kɔni be to a nɔɔ na kudayi!

²⁶Vinɛgiri be ɲiin kɛ cogo min na, walima sisi be ɲadenw kɛ cogo min na, salabagatɔ ta be ten a cibaga bolo.

²⁷Masaba ɲasiran be dɔ fara mɔgɔ sii kan. Nga mɔgɔjugu kɔni sii bena dɔgɔya le.

²⁸Mɔgɔtilennin be nisɔndiya makɔnɔna. Mɔgɔjugu jigi bena tigɛ.

²⁹Masaba ka sira ye yɔrɔ barikaman ye mɔgɔtilenninw fɛ. Nga halakilifɛn lo kojugukɛlaw fɛ.

³⁰Mɔgɔtilennin tena yuguyugu fewu. Nga mɔgɔjuguw tena se ka to dugukolo kan.

³¹Mɔgɔtilennin daa be lɔnniya di. Nga kumakolon fɔbagaw nɛnden bena tigɛ.

³²Mɔgɔtilennin dalakuma mɛn ka di. Nga mɔgɔjugu te foyi fɔ ni juguman tɛ.