Read dyu Talenw kitabu 14 Bible Online

Talenw kitabu 14 - dyu bible

Talenw kitabu 14

¹Muso hakilitigi b'a ka soo ɲa. Nga nalomanmuso b'a ta ci n'a yɛrɛ bolo ye.

²Mɔgɔ min taamacogo ka ɲi, o tigi be siran Masaba ɲa. Nga min be kotilenbali kɛ, o tigi b'a ɲaa don a la.

³Yɛrɛboɲakuma le be naloman daa la. Nga lɔnnikɛla dalakuma b'a sutara.

⁴Misi te mɔgɔ min fɛ ka sɛnɛ kɛ, foyi te o tigi ka bondo kɔnɔ. Sɛnɛkɛmisi barikamanw be sɔrɔ buguya.

⁵Seeresɔbɛ te galon tigɛ, seerekolon ka kolakalinin ye galon ye.

⁶Yɛrɛboɲala be lɔnniya ɲini ka dɛsɛ. Nga hakilitigi ka lɔnniya sɔrɔ, o man gwɛlɛ.

⁷Kana to naloman kɔrɔ. Bari, lɔnniyakuma si te se ka bɔ a daa la.

⁸Yɛrɛkɔlɔsibaga ka lɔnniya, o ye k'a ka kɛta gwɛya. Nga naloman ka fatɔya b'a yɛrɛ fili.

⁹Naloman ko kuun te yafaɲini na kojugu la. Nga ɲumanya be mɔgɔtilenninw cɛ.

¹⁰Ni mɔgɔ dusu cɛnna, a yɛrɛ le b'o lɔn. N'a dusu ka di fana, mɔgɔ wɛrɛ te se k'o diya dɔ sɔrɔ.

¹¹Mɔgɔjugu ka soo be ci, nga mɔgɔtilennin ka soo be yiriwa.

¹² Mɔgɔ be se ka sira dɔ jati siraɲuman ye, k'a sɔrɔ o be laban ni saya ye.

¹³Mɔgɔ be se ka yɛlɛ k'a sɔrɔ a dusu man di. Nisɔndiya fana be se ka laban ni dusukasi ye.

¹⁴Mɔgɔkolon ka kɛwali sara ben'a fa. Mɔgɔtilennin ben'a ta sɔrɔ.

¹⁵Kolɔnbali be la fɔta bɛɛ la. Nga yɛrɛkɔlɔsibaga be jatiminɛ kɛ.

¹⁶Lɔnnikɛla be siran kojugukɛ ɲa, a te sɔn o ma. Naloman kɔni be dimi joona, a lanin b'a yɛrɛ la.

¹⁷Dusutigi be nalomanyako le kɛ. Mɔgɔ kɔnɔnajugu koo ka go mɔgɔw ye.

¹⁸Kolɔnbaliw ta ye nalomanya le ye, lɔnniya ye hakilitigiw ka fugulan ye.

¹⁹Mɔgɔkolonw ben'u kunbiri gwan mɔgɔɲumanw kɔrɔ. Mɔgɔjuguw bena dɛn mɔgɔtilenninw ka daa la.

²⁰Dɛsɛbagatɔ koo ka go, hali a tɔɲɔgɔn ye. Nga nafolotigi teriw kɔni ka ca.

²¹Mɔgɔ min b'a tɔɲɔgɔn lɔgɔbɔ, o tigi be kojugu kɛ. Mɔgɔ min be makari dɛsɛbagatɔ la, o tigi dagamunin lo.

²²Minw be kojugu labɛn, olu b'u yɛrɛ fili. Nga miiriɲumantigi be ɲumanya ni tiɲɛko kɛ.

²³Baara bɛɛ be nafa di, nga kuma gwansan caaman be na ni dɛsɛ ye.

²⁴Nafolo ye lɔnnikɛlaw ka sara ye. Naloman ta ye nalomanya ye.

²⁵Seere tiɲɛfɔla be mɔgɔ kisi. Nga namaramɔgɔw ta ye galon ye.

²⁶Mɔgɔ min be siran Masaba ɲa, o tigi hakili siginin lo kosɔbɛ. A deenw tangabaga ye Masaba yɛrɛ ye.

²⁷Masaba ɲasiran be sii di mɔgɔ ma. A be mɔgɔ bɔsi sayasira la.

²⁸Masacɛ ka jama cayako y'a ka kunkɔrɔta ye. N'a ka mɔgɔw dɛsɛra, o y'a ka fanga cɛnko ye.

²⁹Mɔgɔ min be se a dusu kɔrɔ, o tigi ye hakilitigi ye. Mɔgɔ min be dimi joona, o tigi b'a ka nalomanya le yira.

³⁰Hakilisigi be mɔgɔ kɛnɛya. Nga keliya ye jolijugu ye.

³¹Dɛsɛbagatɔ tɔɔrɔbaga b'a ɲaa don a Danbaga le la. Nga fantan dɛmɛbaga be boɲa la a Danbaga kan.

³²Mɔgɔjugu ka kojugu le b'a ben. Mɔgɔtilennin jigi siginin lo, hali a satuma.

³³Lɔnniya be hakilitigi fɛ. Yala a bena sɔrɔ naloman fɛ wa?

³⁴Tilenninya be kunkɔrɔta di jamana ma, kojugu ye siya maloyafɛn ye.

³⁵Masacɛ ka baarakɛla hakilitigi koo ka d'a ye. Nga min b'a maloya, a be dimi o kɔrɔ.