Read dyu Talenw kitabu 18 Bible Online

Talenw kitabu 18 - dyu bible

Talenw kitabu 18

¹Yɛrɛnafaɲinibaga le be sigi a kelen, n'i ko i b'a ladi, a be dimi.

²Hakilitigiya man di naloman ye. Ka se k'a kɔnɔnata fɔ, o le ka d'a ye.

³Juguya be na ni lɛɛbu ye. Yɛrɛdɔgɔya be na ni maloya ye.

⁴Mɔgɔ dalakuma ye jiba ye. Lɔnniya bɔyɔrɔ ye kɔɔ le ye.

⁵ Ka fara kojugukɛla kan, ka mɔgɔtilennin jalaki kiti la, o ma ɲi!

⁶Naloman dalakuma be na ni kɛlɛ ye. A ka fɔta be na ni bugɔli ye.

⁷Naloman daa b'a mako sa. A daa le ye a yɛrɛ minɛjan ye.

⁸Nafigi ka kuma be i ko nigɛladumuni, dumuni diman.

⁹Mɔgɔ min b'a fari faga a ka baara la, o ni cɛnnikɛla bɛɛ ye kelen ye.

¹⁰Masaba ye dogoyɔrɔ barikaman ye. Mɔgɔtilennin be boli ka taga yen ka kisi.

¹¹Nafolotigi ka nafolo be a fɛ i ko dugu barikaman. A ka miiri la, a be i ko kogojan, min b'a lamini.

¹²Yɛrɛboɲa be na ni cɛnni ye. Yɛrɛmajigi kɔfɛ ye kunkɔrɔta ye.

¹³Mɔgɔ min be kuma jaabi k'a sɔrɔ a m'a mɛn ka ɲa, o tigi ye naloman ye. A ta ye maloya ye.

¹⁴Mɔgɔ hakilisiginin be se bana kɔrɔ. Nga min hakili cɛnna, jɔn be se k'ale dɛmɛ?

¹⁵Hakilitigi be lɔnniya sɔrɔ. Lɔnnikɛla b'a tulo malɔ lɔnniyakuma na.

¹⁶Bonyafɛn be kɛ sababu ye mɔgɔ te degun. A b'a tigi dɛmɛ ka se mɔgɔbabaw fɛ.

¹⁷Kititigɛyɔrɔ la, mɔgɔ min be kɔn ka kuma, ale ta bɔnin be tiɲɛ ma, fɔɔ n'a kɛlɛkɛɲɔgɔn nana kuma tuma min na.

¹⁸Kalabon be sɔsɔli ban. A be setigiw faran ka bɔ ɲɔgɔn na.

¹⁹U donna balima min gasi la, ka gwɛrɛ ale la, o ka gwɛlɛ ka tɛmɛ ka don dugu barikaman kɔnɔ. Ka dugu barikaman minɛ, o ka nɔgɔ ni o sɔsɔli banni ye.

²⁰Mɔgɔ be dumuni kɛ a dalakuma sababu la. A be balo a ka fɔta barika la.

²¹Saya ni sii be sɔrɔ adamaden ka kuma sababu la. Kuma ka di min ye, o tigi ben'a tɔnɔ sɔrɔ.

²²Mɔgɔ min mana muso sɔrɔ, o tigi ye hɛrɛ sɔrɔ. O ye Masaba ka dɛmɛ ye a fɛ.

²³Dɛsɛbagatɔ be daalili kɛ ni yɛrɛmajigi ye, nafolotigi b'a jaabi ni kumagwɛlɛn ye.

²⁴Mɔgɔ teriw be se ka na ni bɔnɛ ye. Nga terisɔbɛ be se ka fisaya ni baden ye.