Read dyu Talenw kitabu 20 Bible Online

Talenw kitabu 20 - dyu bible

Talenw kitabu 20

¹Dɔrɔ be mɔgɔ bila yɛrɛboɲa na, minnifɛn fariman be mankan wili. Hakilitan le b'a min ka fa.

² Masacɛ diminin ni jara sɔngɔtɔ ɲasiran ye kelen ye. A dusu dimibaga be farati a nii kosɔn.

³Ka kɛlɛ ye k'a to yen, boɲa be o le la. Naloman le b'a yɛrɛ funufunu kɛlɛ kama.

⁴Salabagatɔ min ma se ka sɛnɛ kɛ samiɲa na, o be suman ɲini ka dɛsɛ a tigɛwaati la.

⁵ Mɔgɔ kɔnɔnako be i ko jii min ka dun. Hakilitigi le be se k'a bɔ.

⁶Mɔgɔ caaman b'a fɔ k'olu ye kantigiw ye, nga jɔn le be se ka kantigi sɔrɔ?

⁷Mɔgɔtilennin taamacogo ka ɲi. A deenw bena duba sɔrɔ a kɔfɛ.

⁸Ni masacɛ sigira kiti kama tuma min na, koo nin filɛko kelen, a b'a cɛnyɔrɔ ye.

⁹ Jɔn be se k'a fɔ ko ale kɔnɔ gwɛnin lo, ko ale te kojugu kɛ?

¹⁰Ka sumanikɛminanw fila ta san ni feere la, o ye koo ye min ka go Masaba ye.

¹¹Denmisɛn yɛrɛ ka kɛwaliw b'a yira n'a taamacogo ka ɲi, n'a tilennin lo.

¹²Masaba le ye tulo dan mɛnni kama, ale lo ye ɲaa dan yeli kama.

¹³Kan'a to sinɔgɔ be diya i ye. N'o tɛ, fantanya bena se i ma. To ka wili joona, i bena wasa dumuni na.

¹⁴Sannikɛla be kule ko: «A ka gwɛlɛ!» Nga sanni kɛnin kɔ, a nisɔndiyanin le be kɔsegi.

¹⁵Sanu ni kolonkisɛ caaman be sɔrɔ. Nga hakilitigiyakuma fɔbaga sɔrɔ ka gwɛlɛ n'o bɛɛ ye.

¹⁶Mɔgɔ min y'a daa di mɔgɔ wɛrɛ ka juruko la, a ka deleke minɛ. Bari, a ko a be lɔ ni lonan kunko ye.

¹⁷Dumuni soɲani dumu ka di. Nga a laban be kɛ cɛncɛn ye a tigi daa la.

¹⁸Mɔgɔ ka koo latigɛnin be ɲa ladiliw barika la. N'i be taga kɛlɛ la, i ka koow jati minɛ fɔlɔ.

¹⁹Nafigi be gundo walaka. Mɔgɔ min daa te tugu, i yɛrɛ kɔlɔsi o la dɛ.

²⁰Mɔgɔ min b'a faa n'a baa dɔgɔya, o tigi sii be ban i ko fitinɛ be faga cogo min na dibi be don.

²¹Nafolo min sɔrɔla joona joona, o te se ka taga ɲa.

²²Kan'a fɔ ko: «Min kɛra n na, n bena o juru sara.» I ka koo to Masaba bolo, a bena i kisi.

²³Ka namara kɛ sumani la, o ka go Masaba ye. Ka namara kɛ sumanikɛminan na, o ma ɲi.

²⁴Mɔgɔ ka diɲɛlatigɛ be Masaba le bolo. Mɔgɔ be se k'a yɛrɛ taayɔrɔ lɔn cogo di?

²⁵Mɔgɔ min be dajuru ta a kunfɛ ko: «N bena nin kɛ Masaba ta ye,» ka sɔrɔ ka miiri a daa dinin kɔ, o tigi be jaan la a yɛrɛ ɲa.

²⁶Masacɛ hakiliman be mɔgɔjuguw bɔ yen. A b'u tereke duguma.

²⁷Mɔgɔ hakili ye yeelen ye, Masaba be min d'a ma janko a k'a yɛrɛ sɛgɛsɛgɛ.

²⁸Ɲumanya ni tiɲɛ be masacɛ sutara. Tilenninya le b'a ka masaya sabati.

²⁹Kanbelen ka fanga y'a ka kunnawolonfɛn ye. Kunsigigwɛ ye cɛkɔrɔba ka kunkɔrɔtafɛn ye.

³⁰Mandimini le ye juguya fura ye. Bugɔli min be digi kosɔbɛ, ale ye dɔ ye fana.