Read dyu Talenw kitabu 22 Bible Online

Talenw kitabu 22 - dyu bible

Talenw kitabu 22

¹Tɔgɔɲuman ka fisa ni nafolo caaman ye, i koo ka diya tɔw ye, o ka fisa ni warigwɛ ni sanu ye.

²Nafolotigi ni fantan ye kelen ye. Masaba le y'u fila bɛɛ dan.

³ Hakilitigi mana kojugu natɔ ye, a be dogo. Nga kolɔnbali be taga tɛmɛ a kɔrɔ, a daa be to a la.

⁴Yɛrɛmajigi, ani ka siran Masaba ɲa, o nafa ye nafolo, ni kunkɔrɔta ani sijan ye.

⁵Ŋɔni, ani jaanw be mɔgɔjugu ka sira kan. Nga mɔgɔ min b'a yɛrɛ nii fɛ, ale te gwɛrɛ o la.

⁶Siraɲuman don i deen wilitɔkura seen kɔrɔ. Hali n'a kɔrɔbayara, a ten'a bila fewu.

⁷Nafolotigi be fantanw kunna. Jurumantigi ye jurutigi ka jɔɔn ye.

⁸Kojugukɛla be kojugu tɔnɔ sɔrɔ bari, a ka kojugukɛ fanga bena cɛn.

⁹Mɔgɔɲuman bena hɛrɛ sɔrɔ bari, a be to k'a ka dumuni tilan ni dɛsɛbagatɔ ye.

¹⁰Mɔgɔjagabɔbaga gwɛn, kɛlɛ bena ban, sɔsɔli ni ɲɔgɔnlɛɛbu fana be ban.

¹¹Mɔgɔ kɔnɔgwɛ kanubaga ni kumaɲuman fɔbaga, o ye masacɛ teri ye.

¹²Masaba be janto lɔnniya la. Nga a be namarakuma cɛn.

¹³Salabagatɔ ko jara le be kɛnɛma, ko a ben'ala faga sira kan.

¹⁴Kakalamuso dalakuma ye dingɛba ye. Masaba diminin be mɔgɔ min kɔrɔ, o tigi le be ben a kɔnɔ.

¹⁵Nalomankow le ka di denmisɛnw ye, nga u ɲagwanbere b'u bɔ o la.

¹⁶N'i be dɛsɛbagatɔ tɔɔrɔ, a be kɛ fɛntigi ye a laban na. Mɔgɔ min be fɛntigi sɔn, o tigi b'a yɛrɛ dɛsɛra le.

¹⁷I tulo malɔ ka mɛnni kɛ lɔnnikɛlaw ka kuma na. I sɔbɛ don ne ka lɔnniya la.

¹⁸K'u mara i dusu la, u bena diya i ye. I daa labɛnnin ka sɔrɔ a bɛɛ fɔli la.

¹⁹N bena i fana kalan bii janko e jigi ka to Masaba kan.

²⁰N ye dakuru ɲaa bi saba sɛbɛn i ye ka ladili ni lɔnniya d'i ma.

²¹Waasa ka tiɲɛkuma ni koo halala yira i la, i ka se ka jaabili tilennin di e cibaga ma.

²²Kana fantan namara a ka fantanya kama. Kana digi dɛsɛbagatɔ kan kititigɛyɔrɔ la.

²³Bari, Masaba bena lɔ n'a ka koo ye. Mɔgɔ minw b'a ka fɛɛnw bɔsi, a bena olu nii bɔ.

²⁴Kana teriya don ni dusubatigi ye, kana taama ni mɔgɔ fariman ye.

²⁵N'o tɛ, i ben'a ka kɛwaliw dege, min bena kɛ i ka saya sababu ye.

²⁶Kana sɔn ka lɔ ni mɔgɔ ka juru ye dɛ. Kana i daa di dɔ ka juru sara la fewu.

²⁷N'a sɔrɔ i tena cogo sɔrɔ k'a sara. Mun na u bena i ka ladilan bɔsi k'i to a kan?

²⁸I faaw tun ye kabakuru minw bila fɔlɔfɔlɔ k'u ka foro daan bɔ i kana o yɛlɛma.

²⁹I be bololabaarakɛla dɔ lɔn min be se a ka baara la kosɔbɛ wa? A be se ka taga to masaw ɲakɔrɔ sanni a ka to mɔgɔ gwansanw cɛma.