Read dyu Talenw kitabu 23 Bible Online

Talenw kitabu 23 - dyu bible

Talenw kitabu 23

¹N'i tagara dumunikɛyɔrɔ mɔgɔbaba dɔ ka soo, mɔgɔ min siginin be i ɲafɛ, o tigi kɔlɔsi ka ɲa.

²N'o y'a sɔrɔ i ye nugubatɔ ye, i dumuni kɛcogo jati minɛ.

³Kana i ɲaa bɔ a ka dumuni diman fɛ bari, o ye namara dumuni ye.

⁴Kana i yɛrɛ sigɛn ka nafolo ɲini, a koo miiri dabila.

⁵I ɲaa latɔ a kan, a tunutɔ lo. A be i ko gaman b'a fɛ, i n'a fɔ sɛgɛn, ka van sankolo kɔnɔ.

⁶Kana mɔgɔjugu ka dumuni dumu, kana i ɲaa bɔ a ka dumuni diman fɛ.

⁷Bari, a kɔnɔnako n'a ka fɔta te kelen ye. A b'a fɔ ko: «Dumuni kɛ, minni kɛ.» K'a sɔrɔ a kɔnɔ finnin be.

⁸I ye lɔgɔma min kunu, i ben'a fɔɔnɔ. I ka kumaɲuman be kɛ fuu ye.

⁹ Kana kuma naloman tulo kɔrɔ, n'o tɛ, a bena i ka lɔnniyakuma lɔgɔbɔ.

¹⁰U tun ye kabakuru minw bila fɔlɔfɔlɔ ka foro daan bɔ, kana u yɛlɛma. Kana sɛnɛ kɛ ka don falatɔ ta la.

¹¹A dɛmɛbaga ye Setigi ye, ale lo bena lɔ n'a kunko ye i kama.

¹²I sɔbɛ don lɔnniya la. I tulo malɔ lɔnniyakuma na.

¹³Kana deen to kolobali. N'i y'a bugɔ ni golokami ye, a tena sa.

¹⁴Bari n'i y'a bugɔ ni golokami ye, i b'a kisi saya ma.

¹⁵N deen, n'i kɛra kolɔnbaga ye, n dusu bena diya.

¹⁶N'i be kuma ni hɔrɔnya ye, ne nisɔn be diya haali.

¹⁷Kana kojugukɛla ɲagoya. Siran Masaba ɲa tuma bɛɛ.

¹⁸Bari, siniɲasigi b'a la. E jigi tena kɛ gwansan ye.

¹⁹N deen, i tulo malɔ ka kɛ kolɔnbaga ye, i taamacogo be ɲa.

²⁰Kana taama ni dɔrɔtɔw ye dɛ! Kana taama ni sogodumuwaraw ye dɛ!

²¹Bari, dɔrɔtɔ ni dumunibakɛla bena dɛsɛ, salabagatɔya be na ni fanikolondon ye.

²²Mɛnni kɛ i faa fɛ, min y'i wolo. Kana i baa dɔgɔya a kɔrɔya tuma na.

²³I ka tiɲɛ ɲini k'a mara. Lɔnniya, ni ladili, ani hakilitigiya ɲini fana.

²⁴Dentilennin faa be nisɔndiya kosɔbɛ, hakilitigi wolobaga be nisɔndiya.

²⁵A to nisɔndiya ka kɛ i faa n'i baa ta ye. A to nisɔndiya ka kɛ i woloba ta ye.

²⁶N deen, la n na. Ne ka kokɛta ka diya i ye.

²⁷Tiɲɛ na, kakalamuso be i ko dingɛba. Mɔgɔ wɛrɛ muso be i ko kɔlɔn dafitini.

²⁸A be i ko benkannikɛla, a be dɛn, a be cɛɛ caaman bila kakalaya la.

²⁹Jɔnw le b'a fɔ: «Aba!»? Jɔnw le b'a fɔ: «Wi!»? Jɔnw le be kɛlɛ la tuma bɛɛ? Jɔnw le be sɔngɔra tuma bɛɛ? Jɔnw le mandiminin be ni kuun t'a la? Jɔnw le be yeli kɛra fila fila?

³⁰Minw be sigi ka mɛn duvɛnmin na, olu lo. Minw be minnifɛn ɲagamininw fɛ, olu lo.

³¹Kana i ɲaa bɔ duvɛn ɲaa wulencogo fɛ dɛ. Kan'a manamanacogo filɛ filen kɔnɔ dɛ, a jigi ka teli gɔnɔ na.

³²A laban be mɔgɔ cin i ko saa, a b'a cin i ko fɔnfɔnni.

³³I bena kabakofɛnw ye, i ka miiri bena i bila nalomanyakuma na.

³⁴I bena kɛ i ko mɔgɔ min lanin be kɔgɔji kɔnɔ, i ko mɔgɔ min lanin be kurunba sanfɛ, n'a be fifa.

³⁵Min ko: «U ye n bugɔ! Nga n yɔrɔ si te n dimina! U ye n tinba! A ma digi n na. Ni n kununna, n bena dɔ min tugu.»