Read dyu Talenw kitabu 24 Bible Online

Talenw kitabu 24 - dyu bible

Talenw kitabu 24

¹Kana mɔgɔjugu ɲagoya, kana sɔn a ka taamaɲɔgɔnya la.

²Bari, u ka miiri be kojugukɛ le kan dɔrɔn, u be kojugu dama le fɔ.

³Mɔgɔ be soo lɔ lɔnniya barika la. Hakilitigiya le b'a to mɔgɔ ka soo sigicogo be ɲa.

⁴Soo be fa lɔnniya sababu la, dakamanaminanw, ni minanɲumanw be sɔrɔ a kɔnɔ.

⁵Hakilitigi fanga ka bon. Kolɔn be mɔgɔ barika boɲa.

⁶Kɛlɛdenw be kɛlɛ kɛ ni jatiminɛ le ye, u be see sɔrɔ ladilikɛbagaw caya kosɔn.

⁷Naloman te se ka hakilitigi ka kuma faamu. A man kan k'a daa yɛlɛ dugu koo ɲanabɔyɔrɔ la.

⁸Mɔgɔ min be kojugukɛ miiri, o tigi le be wele janfamɔgɔ.

⁹Naloman te miiri foyi la ni kojugu tɛ. Mɔgɔ ɲanagwɛlɛn koo ka go mɔgɔw ye.

¹⁰Gwɛlɛya loon na, n'i b'i fari faga, i barika ka dɔgɔ dɛ!

¹¹U be tagara ni mɔgɔ min ye fagayɔrɔ, o kisi. U be min talontalonna ka ta'a halaki, o bɔsi.

¹²N'i ko: «A filɛ! Ne tun ma bɔ a kala ma!», o tuma, mɔgɔw kɔnɔnako lɔnbaga m'o faamu wa? Ale min b'i tanga, a b'a lɔn do. A bena mɔgɔ kelen kelen bɛɛ ka kɛta sara.

¹³Lii dumu n deen, a ka di dɛ. Liwaga bena diya i daa la dɛ.

¹⁴Lɔnniya bena kɛ i ma hɛrɛ ye ten, i k'a lɔn. N'i y'a sɔrɔ, a bena kɛ i ma siniɲasigi ye, i jigi tena kɛ gwansan ye.

¹⁵Kana dɛn mɔgɔtilennin ka yɔrɔ la i ko benkannikɛla. Kan'a ka boon ci.

¹⁶Bari, mɔgɔtilennin be ben siɲɛ caaman ka wili. Nga gwɛlɛya tuma na, mɔgɔjugu be ben pepewu.

¹⁷Kana yɛlɛko i jugu benko la. Kana nisɔndiya ko i jugu nagasira.

¹⁸N'o tɛ, ni Masaba y'o ye, o tena diya a ye. A bena tila k'a ka dimi nɔgɔya i jugu kan.

¹⁹ Kana dimi kojugukɛla kosɔn. Kana i ɲaa bɔ mɔgɔjugu fɛ.

²⁰Bari siniɲasigi te kojugukɛla fɛ. Mɔgɔjugu ka fitinɛ bena faga.

²¹N deen, siran Masaba ni masacɛ ɲa. Kana fara mɔgɔmurutininw kan.

²²Bari balawu be se ka bari u la. Masaba, walima masacɛ bena tɔɔrɔ min lase u ma, e t'o lɔn.

²³Nin ye lɔnnikɛlaw ta ye tugu. Ka wolomani kɛ kiti la, o ma ɲi.

²⁴Mɔgɔ o mɔgɔ man'a fɔ mɔgɔjugu ye ko: «Tiɲɛ b'i fɛ.» Jama bena o tigi danga, siyaw ben'a maloya.

²⁵Mɔgɔjugu jalakibaga ta ka ɲi, a bena duba ni boɲa sɔrɔ.

²⁶Ka jaabili kɛ ni kɔnɔgwɛ ye, o ye teriya taamasiɲɛ ye.

²⁷I ka baara labɛn kɛnɛma, a labɛn i ka foro la. O kɔ, i bena se k'i ka soo lɔ.

²⁸Kana kɛ seere ye i sigiɲɔgɔn kama ni tiɲɛ tɛ. Walima i b'a fɛ ka mɔgɔ namara i ka kuma na wa?

²⁹Kan'a fɔ ko: «N ben'a ta ɲɔgɔn kɛ a la. N bena mɔgɔ kelen kelen bɛɛ sara ka kɛɲɛ n'a ka kɛta ye.»

³⁰Ne tɛmɛna salabagatɔ dɔ ka foro daa la, hakilitan dɔ ka *ɛrɛzɛnforo daa la.

³¹Mun le be ye yen? Ŋɔni ni binjugu kɛra k'a bɛɛ datugu. Kogo min tun lɔra ni kabakuru ye, ale benna.

³²Ne y'a filɛ, k'a jati minɛ. Ne ye koo min ye, o ye hakili di ne ma ko:

³³ «E lo be la ka jan, e lo be la ka sinɔgɔ, e lo te foyi kɛ.

³⁴Fantanya be na cun i kan i ko soon, dɛsɛ bena bari i la i ko benkannikɛla.»