Read dyu Talenw kitabu 26 Bible Online

Talenw kitabu 26 - dyu bible

Talenw kitabu 26

¹Sanji ni *sanji siminin te ben suman tigɛtuma na cogo min na, o cogo kelen la, boɲa te bɛn naloman ma.

²Kɔnɔnin ni naganagani be van ka tɛmɛ cogo min na, o cogo kelen la, kuun te danga min na, o be tɛmɛ gwansan.

³ Busan ka kan ni soo ye, dajuru ka kan ni fali ye, bere le ka kan naloman kɔɔ la.

⁴Kana naloman jaabi n'a ka nalomanyakuma ɲɔgɔn ye, n'o tɛ, aw bena kɛ kelen ye.

⁵Naloman jaabi ka kɛɲɛ n'a ka nalomanya ye, n'o tɛ, a ben'a yɛrɛ jati hakilitigi ye.

⁶Naloman cibaga be i ko mɔgɔ min b'a yɛrɛ seen tigɛra. A be kunko ɲini a yɛrɛ ye.

⁷Muruku seenw b'a kɔrɔ cogo min na, talen fana be ten naloman daa la.

⁸Ka kabakuru siri bɛrɛbonnan na ko i b'a bon, o ni ka boɲa la naloman kan, le ye kelen ye.

⁹Naloman ka talen la, o ni dɔrɔtɔ ka ŋɔnibusan ta a bolo, o ye kelen ye.

¹⁰Mɔgɔ min be naloman, walima tɛmɛbaga ta baara la, o tigi be i ko kalatigi min be mɔgɔw bɛɛ mandimi.

¹¹Wulu be segi k'a fɔɔnɔ dumu cogo min na, o cogo kelen na, naloman be segi a ka nalomanyakow kan.

¹²Mɔgɔ min b'a yɛrɛ jati hakilitigi ye, ale ka nalomanya ka jugu ni naloman ta ye.

¹³Salabagatɔ ko: «Wara le be sira kan, jara be bɔlɔnw na.»

¹⁴Koon be munumunu a seenw kan cogo min na, salabagatɔ be yɛlɛmayɛlɛma a ka dilan kan ten le.

¹⁵Salabagatɔ b'a bolo don dumunikɛminan kɔnɔ. A segiko k'a don a daa la, o ye baara ye.

¹⁶Salabagatɔ b'a miiri ko ale ka ceku ni mɔgɔ wolonwula ye minw be se mɔgɔ jaabicogo la.

¹⁷K'i niin don kɛlɛ la min t'i ta ye, o ni ka wulu tɛmɛtɔ ye ko i b'a minɛ a tulow ma, ye kelen ye.

¹⁸Fatɔ min b'a la ka tasuma fili a gɛrɛfɛlaw la, ani ka biɲɛw bon, minw ye mɔgɔfagakow ye,

¹⁹o ni mɔgɔ min b'a tɔɲɔgɔn nigɛ ka tila k'a fɔ ko tolon tun lo, o ye kelen ye.

²⁰Ni lɔgɔ dɛsɛra gwaa la, tasuma be faga. Ni nafigi bɔra aw cɛ la, kɛlɛ be ban.

²¹Finfin mananin ye takami ye, lɔgɔ be mana ka kɛ tasuma ye. O cogo kelen na, kɛlɛtigɛla be kɛlɛ juguya.

²²Nafigi ka kuma be i ko nigɛladumuni, dumuni diman.

²³Kuma diman fɔbaga min kɔnɔ ka jugu, o ni ka warigwɛ nɔgɔnin yelen k'a mɔ bɔgɔdaga la, ye kelen ye.

²⁴Mɔgɔjugu b'a daa diya, nga a kɔnɔ finnin lo.

²⁵N'a ye kuma diman fɔ, kana l'a la bari, miiriyajugu caaman b'a kɔnɔ.

²⁶A be se k'a tɔɲɔgɔn kɔniyako dogo cekuya kosɔn, nga a ka juguya bena ye jama cɛma.

²⁷Mɔgɔ min be dingɛkolon sogi, o tigi le be ben a kɔnɔ. Kabakuru be kɔsegi ka ben a kolonkolonbaga le kan.

²⁸Galontigɛla be minw tɔɔrɔ, olu koo ka go a ye. Mɔgɔnigɛbaga be na ni bɔnɛ ye.