Read dyu Talenw kitabu 28 Bible Online

Talenw kitabu 28 - dyu bible

Talenw kitabu 28

¹ Mɔgɔjugu be boli k'a sɔrɔ mɔgɔ t'a gwɛnna. Nga mɔgɔtilennin hakili siginin lo i ko jarakanbelen.

²Ni murutili be kɛ jamana min kɔnɔ, a kuntigiw be caya. Nga hakilitigi kolɔnbaga sababu la, ɲamalɔ be na.

³Kuntigi min be dɛsɛbagatɔw tɔɲɔ, o ni sanjugu bɛnnin bɛɛ ye kelen ye. A tɛmɛnin kɔfɛ, dumuni te yen.

⁴Mɔgɔ min be ban Ala ka sariya la, o tigi be mɔgɔjuguw tanu. Sariya batobagaw be dimi mɔgɔjugu kɔrɔ.

⁵Mɔgɔjugu te tilenninyako faamu. Nga Masaba yɔrɔ ɲinibagaw be koo bɛɛ faamu.

⁶Fantan min taamacogo ka ɲi, ka fisa ni nafolotigi namaramɔgɔ ye.

⁷Sariya batobaga ye deen hakilitigi ye. Nga deen min be taga kakalaw fɛ, o be maloya bil'a facɛ la.

⁸Jurudonbaga min be tɔnɔjugu ɲini k'a ka nafolo caya, o nafolo nin be yɛlɛma ka kɛ mɔgɔ wɛrɛ ta ye min be makari fantanw na.

⁹Mɔgɔ min te sɔn sariyakuma be don a tulo la, ale ka Aladali yɛrɛ ye fɛnjugu ye.

¹⁰Mɔgɔ min be kɛ sababu ye ka mɔgɔtilennin bila sirajugu kan, o tigi bena ben a yɛrɛ ka jaan kɔnɔ. Nga mɔgɔɲuman bena hɛrɛ sɔrɔ.

¹¹Nafolotigi be miiri ko ale ye kolɔnbaga ye. Nga fantan hakilitigi be se k'a ka koo faamu.

¹²Ni mɔgɔtilennin ye see sɔrɔ, o boɲa be se bɛɛ ma. Ni mɔgɔjugu ye fanga ta, bɛɛ b'a yɛrɛ ɲini.

¹³Mɔgɔ min te lɔ a ka kojugu kɛnin na, o ka koo te ɲa. Nga min be lɔ a ta la, ani ka nimisa u la, Ala be makari ale la.

¹⁴Mɔgɔ min b'a yɛrɛ kɔlɔsi kojugu la tuma bɛɛ, o tigi dagamunin lo. Nga min kɔni b'a dusu gwɛlɛya, bɔnɛ bena o tigi sɔrɔ.

¹⁵Mɔgɔjugu ka kɛ kuntigi ye fantanjamana na, o ni jara ŋunatɔ, walima warajugu kɔngɔtɔ ka kan.

¹⁶Ɲamɔgɔ hakilitan kɔni be to ka bagamako kɛ dɔrɔn. Min te sɔn namarafɛn ɲini la, ale bena sijan sɔrɔ.

¹⁷Mɔgɔ min nii tɔɔrɔnin lo bari a ye mɔgɔ faga, ale bena boli fɔɔ ka se kaso la. Mɔgɔ kan'a lalɔ.

¹⁸Mɔgɔ min taamacogo ka ɲi, o tigi be kisi. Nga min be faan fila koo kɛ, o tigi be ben.

¹⁹Mɔgɔ min b'a ka foro sɛnɛ, o tigi bena fa dumuni na. Nga min be boliboli kokuntanw kɔ, dɛsɛ bena to a kan.

²⁰Mɔgɔtilennin be duba sɔrɔ kosɔbɛ. Nga mɔgɔ min kɔrɔtɔnin lo ka kɛ nafolotigi ye, o tigi ɲagwanbali tena to.

²¹A ma ɲi mɔgɔ ka mɔgɔ woloma. Nga mɔgɔ dɔw b'o kojugu nin kɛ lɔgɔma kelen yɛrɛ kama.

²²Wasabali be boli nafolo kɔ. A t'a lɔn ko dɛsɛ bena se a ma.

²³Mɔgɔ jalakibaga koo be tila ka diya o tigi ye ka tɛmɛ a nigɛbaga kan.

²⁴Mɔgɔ min b'a faa n'a baa bololafɛn soɲa k'a fɔ k'o te kojugu ye, o tigi ni cɛnnikɛla ka kan.

²⁵Yɛrɛboɲala ye kɛlɛtigɛla ye. Nga mɔgɔ min b'a jigi la Masaba kan, o tigi bena nafolo caaman sɔrɔ.

²⁶Mɔgɔ min b'a jigi la a yɛrɛ ka miiriya kan, o tigi ye naloman le ye. Nga min be taama ni hakilitigiya ye, ale bena kisi.

²⁷Mɔgɔ min be dɛsɛbagatɔ sɔn, o tigi tena dɛsɛ foyi la. Nga min t'a fɛ ka dɛsɛbagatɔ ye, danga b'o tigi kan.

²⁸Ni mɔgɔjugu ye fanga ta, mɔgɔ kelen kelen bɛɛ be dogo. Nga n'a ka fanga cɛnna, mɔgɔtilenninw be caya.