Read dyu Talenw kitabu 3 Bible Online

Talenw kitabu 3 - dyu bible

Talenw kitabu 3

¹N deen, kana ɲinɛ n ka kuma kɔ, n ka ladiliw mara i dusu la.

²Bari, u bena dɔ fara e sii kan, i bena hɛrɛ ni sijan sɔrɔ.

³Kana ɲumanya ni tiɲɛ dabila. I ka masirifɛn ka kɛ olu ye, i k'u mara i dusu la.

⁴ O la, i koo bena diya Ala n'i tɔɲɔgɔnw ye. U bena i jati hakilitigi ye.

⁵E jigi la Masaba kan sɔbɛ la. Kan'i bolo la i yɛrɛ ka lɔnniya kan.

⁶I ka koo bɛɛ la, miiri a la, a bena i ka sira gwɛya i ye.

⁷ Kana i yɛrɛ jati kolɔnbaga ye. Siran Masaba ɲa, ka kojugu dabila.

⁸O bena kɛ fura ye i fari ma, a bena i dimiyɔrɔw suma.

⁹Masaba boɲa n'i bolofɛnw ye, k'a fo. E k'i ka sɛnɛfɛn bɛɛ deen fɔlɔw d'a ma.

¹⁰N'o kɛra, i ka bondow bena fa kosɔbɛ, i ka duvɛn marayɔrɔw bena fa.

¹¹ N deen, kana ban Masaba ka ladili ma. Kan'a to o be digi e la.

¹² Bari, Masaba b'a diyanamɔgɔ le ladi, i ko faa b'a deen kanunin ladi cogo min na.

¹³Mɔgɔ min ye lɔnniya sɔrɔ, o tigi dagamunin lo. Mɔgɔ min ye hakilitigiya sɔrɔ, o dagamunin lo.

¹⁴Bari, a nafa ka fisa ni warigwɛ ta ye, a fana ka bon ni sanu ta ye.

¹⁵A ka fisa ni kɔnɔkisɛ ye. I diyanafɛnw si te se ka suma n'a ye.

¹⁶Sijan b'a kinibolo fɛ, nafolo ni kunkɔrɔta fana b'a numanbolo fɛ.

¹⁷A sira taama ka di, a tɛmɛyɔrɔw bɛɛ ye hɛrɛ ye.

¹⁸Lɔnniya be sii di a sɔrɔbaga ma. A sɔrɔbagaw fana dagamunin lo.

¹⁹Masaba ye dugukolo dan ni lɔnniya ye, a ye sankolo kɛ ni hakilitigiya ye.

²⁰A ka lɔnniya le barika la, jii be bɔ dugukolo jukɔrɔ, ani sankaba be jii tɔni.

²¹N deen, to ka miiri ani ka jatiminɛ kɛ dɛ! Kana i yɔrɔ jaɲa o la abada!

²²O bena sii d'i ma, o bena kɛ masirifɛn ye i kaan na.

²³O tuma na, i bena taama hakilisigi la. I seen tena talon.

²⁴N'i lara, i tena siran foyi ɲa, i bena sinɔgɔ ka ɲa.

²⁵Kana siran gwɛrɛgwɛrɛ ɲa, walima mɔgɔjuguw ka benkanni ɲa.

²⁶Sabu, Masaba le y'i jigi ye. A bena i seen tanga jaanw bɛɛ ma.

²⁷Ni koɲumankɛ see b'i ye, ni mɔgɔ dɔ mako b'o la, kana ban k'o kɛ a tigi ye.

²⁸Kan'a fɔ i tɔɲɔgɔn ye ko: «Taga ka na. Sini, n ben'a d'i ma.» K'a sɔrɔ a see b'i ye.

²⁹Kana juguya labɛn i tɔɲɔgɔn kama. K'a sɔrɔ a lanin b'i la ko aw ye sigiɲɔgɔnmanw ye.

³⁰Kan'a to e ni mɔgɔ dɔ ka bila ɲɔgɔn na gwansan, k'a sɔrɔ a tigi ma kojugu foyi kɛ i la.

³¹Kan'a to mɔgɔ fariman ka koo nigɛ k'i minɛ, kan'a ka kɛwaliw si ladege.

³²Bari, mɔgɔjugu koo ka go Masaba ye. Nga a be mɔgɔɲumanw kɛ a teriw ye.

³³Masaba be mɔgɔjugu ka soo halaki. A be mɔgɔtilennin ta ɲa.

³⁴ A b'a jagabɔbagaw dɔgɔya, a be nɛɛma kɛ mɔgɔmajigininw ye.

³⁵Kunkɔrɔta bena kɛ lɔnnikɛla ta ye. Nga naloman ta bena kɛ maloya ye.