Read dyu Talenw kitabu 5 Bible Online

Talenw kitabu 5 - dyu bible

Talenw kitabu 5

¹N deen, n ka lɔnniyakuma lamɛn, i tulo malɔ ne ka hakilitigiyakuma na,

²janko i be kɛ lɔnnikɛla ye. O la, i ka kuma fɔtaw bena kɛ hakilitigi ta ye.

³Bari kakalamuso dalakuma ka di i ko lii. A ka fɔta nugunin be i ko tulu.

⁴Nga a ka koo laban ka kunan kosɔbɛ. A ka fari i ko muru daa fila.

⁵A be taga ni mɔgɔ ye saya yɔrɔ la. A be se lahara.

⁶A be sii sɔrɔ sira min kan, a t'o ta ka ye. A be tunu sira kan, n'a te bɔ o kala ma.

⁷Sisan ne deenw, aw ye mɛnni kɛ. Aw kana ne dalakuma bila fewu.

⁸Aw yɔrɔ ka jaɲa musokolon na, aw kana gwɛrɛ a ka soo daa la,

⁹janko aw barika kana yɛlɛma mɔgɔ wɛrɛ fɛ, aw sii tile kana don mɔgɔ hinɛbali bolo.

¹⁰Lonan dɔw kana aw bololafɛnw kɛ u yɛrɛ ta ye. Aw ka baara nafa kana kɛ mɔgɔ wɛrɛ ta ye,

¹¹janko aw kana to ka ŋunan a laban na, aw fanga n'aw barika banwaati la.

¹²O tuma na sa, aw ben'a fɔ ko: «A kɛra di ladili tun man di ne ye? A kɛra di ne ma sɔn mɔgɔw ka ladiliw ma?

¹³Mun na ne ma mɛnni kɛ n kalanbagaw fɛ? Mun na ne ma n tulo malɔ n kalanbagaw fɛ?

¹⁴Fɔɔ a tora dɔɔni dɔrɔn ne ta be cɛn pewu, jama cɛma.»

¹⁵I yɛrɛ ka jii marayɔrɔ jii min. Jii min be bɔ i ka kɔlɔn kɔnɔ, o min. [1]

¹⁶I ka jii bɔyɔrɔ jii ka kan ka bɔn kɛnɛma wa? I ka kɔɔ jii ka kan ka bɔn forobayɔrɔ la wa?

¹⁷A ka kɛ i kelenpe ta ye, lonan niin t'a la.

¹⁸I ka jii bɔyɔrɔ ka barika sɔrɔ. E nisɔndiya n'i kanbelentuma muso ye.

¹⁹A cɛɛ ka ɲi i ko minan, a fari k'i wasa waati bɛɛ. A ka kanuya k'i minɛ tuma bɛɛ.

²⁰N deen, mun na e b'i ɲaa bɔ kakalamuso fɛ? Mun na i be muso wɛrɛ siin mɔmɔ?

²¹Tiɲɛ na, Masaba ɲaa be mɔgɔ ka kɛwaliw la. A b'a taamacogo bɛɛ kɔlɔsi.

²²Mɔgɔjugu ka kɛwalijuguw be kɛ a yɛrɛ ma sababu ye. A ka kojugu be kɛ a dɛrɛfɛn ye.

²³A be sa kolɔnbaliya kosɔn. A be tunu a ka nalomanya dama tɛmɛnin fɛ.