Read dyu Waajulikɛla ka kitabu 11 Bible Online

Waajulikɛla ka kitabu 11 - dyu bible

Waajulikɛla ka kitabu 11

¹I k'i ka dumuni fili jii sanfɛ, a mɛn o mɛn, i ben'a sɔrɔ tugu.

²Mɔgɔ wolonwula, walima mɔgɔ seegi niyɔrɔ bɔ i bololafɛn na, bari, bɔnɛ min bena se dugukolo kan, i t'o lɔn.

³Ni sankaba fara jii la, sanji be jigi dugukolo kan. Ni yiri benna k'a kuun sin worodugu ɲafan fɛ, walima kɔgɔdugu ɲafan fɛ, a be to a benyɔrɔ la yen.

⁴Mɔgɔ min be siga fɔɲɔ taacogo la, o tigi tena danni kɛ. Min be siga sanji la, o tena suman tigɛ.

⁵Deen be ninakili sɔrɔ ka labɛn cogo min na a baa kɔnɔ, i t'o lɔn. O cogo kelen na fana, i te se ka Ala ka koo kɛninw faamu. Ale min be koo bɛɛ kɛ.

⁶K'a ta sɔgɔma, i ka danni kɛ, i kana lafiɲɛ fɔɔ ka taga se wulafɛ ma. Bari, i ka baara min bena ɲa, i t'o lɔn. Nafa bena bɔ a bɛɛ la wa, i t'o lɔn.

⁷Yeelen ka ɲi. Adamaden ka yeli kɛ, o fana ka ɲi.

⁸Ni mɔgɔ min ye sii sɔrɔ, a ka kan ka nisɔndiya o saan kelen kelen bɛɛ kɔnɔ. Nga a k'a hakili to a la ko loon gwɛlɛman caaman [1] bena se. Fɛɛn min bɛɛ bena na kɔfɛ, o bɛɛ ye koo faamubali ye.

⁹Kanbelen, i nisɔn diya i denmisɛn tile la. I dusu ka diya i kanbelenya waati la. Fɛɛn o fɛɛn diyara i ye, o kɛ. I ɲaa be bɔ fɛɛn o fɛɛn fɛ, o kɛ. Nga i k'a lɔn ko Ala bena e ɲininga o bɛɛ la.

¹⁰O la, dusukasi yɔrɔ jaɲa i la. I kana koo kɛ min bena kɛ i ma tɔɔrɔ ye. Bari, kanbelenya n'a diya be tɛmɛ joona.