Read dyu Waajulikɛla ka kitabu 4 Bible Online

Waajulikɛla ka kitabu 4 - dyu bible

Waajulikɛla ka kitabu 4

¹Ɲɔgɔntɔɔrɔ min bɛɛ be kɛra diɲɛ na, ne y'o bɛɛ ye fana. Tɔɔrɔbagaw be kasi, dususaalobaga te u la. Fanga ye u tɔɔrɔbagaw ta ye, dususaalobaga te u la.

²O kama, ne b'a fɔ ko mɔgɔ minw sara ka ban, k'olu dagamunin be ka tɛmɛ ɲanamanw kan.

³Nga mɔgɔ min ma wolo ka diɲɛ kɔnɔ kojuguw ye, ale dagamuna ka tɛmɛ u bɛɛ kan.

⁴Mɔgɔ be jija ka baara min bɛɛ kɛ, ka taga ɲa kosɔbɛ, ne y'a ye k'o bɛɛ be na ni keliya ye. O fana ye kabako ye, a be i n'a fɔ mɔgɔ min b'a fɛ ka fɔɲɔ mara.

⁵ Naloman be sigi, a te foyi kɛ, a b'a yɛrɛ mako sa.

⁶Mɔgɔ ka lafiɲɛ fitini sɔrɔ, o ka fisa ni baara caaman ye a be i n'a fɔ mɔgɔ min b'a fɛ ka fɔɲɔ mara.

⁷Ne be kabako wɛrɛ yera diɲɛ kɔnɔ.

⁸Mɔgɔ dɔ be yen min b'a kelen, deen t'a fɛ, balima t'a fɛ. K'a sɔrɔ, daan t'a ka baara kɛta la. A te wasa nafolo la. A be tila k'a fɔ ko: «O tuma na sa, ne be baara min kɛra, ni n te lafiɲɛ, ne b'o kɛra jɔn ye?» O fana ye kabako ye, kojugu lo.

⁹Mɔgɔ fila ka fisa mɔgɔ kelen ye, bari tɔnɔ b'u ka baara la kosɔbɛ.

¹⁰N'u dɔ benna, kelen be kelen dɛmɛ ka wili. Nga mɔgɔ min b'a kelen na, bɔnɛ y'o ta ye. N'a benna, filanan t'a la k'a dɛmɛ.

¹¹Ni mɔgɔ fila lara ɲɔgɔn fɛ, u fari be gwan. Ni mɔgɔ lar'a kelen, a fari bena gwan cogo di?

¹²Mɔgɔ kelen te se mɔgɔ min kɔrɔ, n'u kɛra fila, u bena se a kɔrɔ. Ni jurukisɛ danna ni gaari saba ye, fanga b'a la kosɔbɛ.

¹³Denmisɛn dɛsɛbagatɔ hakilitigi ka fisa ni masa cɛkɔrɔba naloman ye, min te sɔn ladili ma tugu.

¹⁴Hali ni o deen nin bɔra kaso la ka sigi jamana kunna, hali n'a wolola fantanya la a ka jamana kɔnɔ,

¹⁵diɲɛ mɔgɔw bɛɛ tugur'a kɔ, ale min sigira masacɛ nɔɔ na, ne ɲaa y'o ye.

¹⁶Daan tun te o jama nin na, ale kɛra o minw ka masa ye. Nga n'a sɔrɔ waati wɛrɛ mɔgɔw tena nisɔndiya a ka koo la. O fana ye kabako faamubali ye, min be i n'a fɔ mɔgɔ min b'a fɛ ka fɔɲɔ mara.

¹⁷I taatɔ Ala ka soo kɔnɔ, i k'i taamacogo kɔlɔsi. I ka gwɛrɛ ka mɛnni kɛ, o ka fisa e ka saraka bɔ Ala ye nalomanya la. O ye kojugu ye, u do t'o lɔnna.