Read dyu Waajulikɛla ka kitabu 8 Bible Online

Waajulikɛla ka kitabu 8 - dyu bible

Waajulikɛla ka kitabu 8

¹Jɔn ye hakilitigi ye n'a be koo kɔrɔ lɔn? Lɔnniya be mɔgɔ ɲaa yɛlɛ, k'a ɲada cogo yɛlɛma.

²Ne ko: sɔn masacɛ ka fɔta ma. Bari, e y'i daa di Ala ma o la.

³Kana kɔrɔtɔ ka ban a ka koo la. Kana i kuun gwɛlɛya ka kojugu kɛ. Bari, koo o koo y'a diya, a bena o kɛ.

⁴Sabu, a ka kuma ye faamakuma ye. Jɔn be se k'a fɔ a ma ko: «I be mun le kɛra?»

⁵Mɔgɔ min be sariya bato, o tigi te don kojugu la. Hakilitigi b'a lɔn ko kiti tigɛwaati be yen.

⁶Bari koo bɛɛ n'a kitiwaati lo. [1] Adamaden ka kojugu kɛra doni gwiliman ye a kunna.

⁷Fɛɛn min bena kɛ, a t'o lɔn. Jɔn be se k'a fɔ a ye ko koow bena kɛ ten, walima ten?

⁸Adamaden si te se k'a yɛrɛ nii bɔko bali. A te se k'a yɛrɛ kisi a salon ma. Kɛlɛden te se ka labila kɛlɛ waati la. Mɔgɔjuguw ka juguya tena se k'u kisi fana.

⁹Koo minw bɛɛ be kɛra dugukolo kan, ne y'o bɛɛ jati minɛ k'a ye ko waati dɔ, adamaden le be kuntigiya kɛ a tɔɲɔgɔn kan k'a tɔɔrɔ.

¹⁰Ne ye mɔgɔjuguw ye, u y'o suu don ka ɲa. U tun be to ka taga Ala ka soo kɔnɔ. Dugumɔgɔw ɲinɛna u ka kɛwaliw kɔ. O fana ye kabako ye.

¹¹Ɲagwan min ka kan ka kojugu juru sara, o t'a tigi sɔrɔ a kɛtuma na, o la, kojugukɛ nigɛ be to adamaden dusu la tuma bɛɛ.

¹² Mɔgɔjugu be se ka kojugubaba caaman kɛ, a fana be sijan sɔrɔ. O bɛɛ n'a ta, ne y'a lɔn ko mɔgɔ minw be siran Ala ɲa, k'olu bena hɛrɛ sɔrɔ u ka Alaɲasiran kosɔn.

¹³Nga mɔgɔjugu kɔni tena hɛrɛ sɔrɔ. A sii tena taga ɲa, a ka koo bena tɛmɛ i n'a fɔ suma. Bari a te siran Ala ɲa.

¹⁴Kabako wɛrɛ be kɛra dugukolo kan. Mɔgɔtilennin dɔw be yen, o b'u minɛ i n'a fɔ mɔgɔjuguw, ka mɔgɔjugu dɔw minɛ i n'a fɔ mɔgɔtilenninw. Ne k'o fana ye koo faamubali le ye.

¹⁵O la, ne b'a fɔ tuma bɛɛ ko ka nisɔndiya, o le ka ɲi. Bari, fɛɛn min ka ɲi adamaden ma dugukolo kan, o ye a ka dumuni kɛ, ka minni kɛ ka nisɔndiya. O n'a ka baara be taga ɲɔgɔn fɛ a sii la, Ala ye min d'a ma dugukolo kan.

¹⁶Ne tun b'a fɛ ka lɔnniya ɲini tuma min na ni n dusu bɛɛ ye, ka adamadenw ka kɛwaliw jati minɛ dugukolo kan. Suu fara tile kan, adamaden te sinɔgɔ.

¹⁷Ne ye Ala ka koo kɛnin bɛɛ jati minɛ k'a ye ko koo minw be kɛra dugukolo kan, ko adamaden te se k'o lɔn. A b'a yɛrɛ sigɛn o lɔnko la, a do ten'a lɔn. Hali ni lɔnnikɛla y'a fɔ ko a b'a lɔn, a bena to a faamubaliya la.