Read dyu Waajulikɛla ka kitabu 9 Bible Online

Waajulikɛla ka kitabu 9 - dyu bible

Waajulikɛla ka kitabu 9

¹Tiɲɛ na, ne ye nin bɛɛ jati minɛ kosɔbɛ. Ne y'a bɛɛ sɛgɛsɛgɛ k'a lɔn ko mɔgɔtilenninw, ani hakilitigiw, ni u ka baaraw be Ala bolo. Kanuyako, ni kɔniyako faan fɛ, adamaden ka lɔnko tena se o ma. [1]

²Ayiwa, mɔgɔw bɛɛ bena fɛɛn kelen sɔrɔ: mɔgɔtilennin ani mɔgɔjugu bena fɛɛn kelen sɔrɔ, mɔgɔɲuman ni mɔgɔ kɔnɔgwɛ, ani mɔgɔ kɔnɔ finnin, mɔgɔ min be begɛn saraka, ani min t'a kɛ. Mɔgɔsɔbɛ ni kojugukɛla bɛɛ ka koo bena kɛ kelen ye. Mɔgɔ min b'a daa di Ala ma, ni min be siran k'o kɛ, u ka koo bena kɛ kelen ye.

³Koo minw bɛɛ be kɛra diɲɛ na, o juguya yɔrɔ ye nin ye: mɔgɔ bɛɛ laban ye kelen ye. Kojugukɛ nigɛ fana be to adamadenw dusu la. U be to nalomanyakow la u sii la, ka sɔrɔ ka taga tɔw taayɔrɔ la.

⁴Ka mɔgɔ to nii na, jigi b'a fɛ. Wulu min be nii na, o ka fisa ni jarasu ye.

⁵Bari, mɔgɔ minw be nii na, olu b'a lɔn k'u bena sa. Nga minw sara ka ban, olu te foyi lɔnna tugu. Sara te u tɔgɔ la tugu, u koo te to hakili la tugu.

⁶U ka kanuya, n'u ka kɔniya, n'u ka kɔnɔnajuguya bɛɛ tɛmɛna ka ban. Koo minw bɛɛ be kɛ diɲɛ na, olu niyɔrɔ t'o si la tugu.

⁷Ayiwa, i ka dumuni kɛ nisɔndiya la, i nisɔn diyanin k'i ka minni kɛ. Bari Ala sɔnna i ka baaraw ma ka ban.

⁸Fanigwɛ ka sɔrɔ i kaan na tuma o tuma. Tulu kasadiman ka sɔrɔ i kuun na tuma bɛɛ.

⁹I nisɔn diya n'i diyanamuso ye i sii bɛɛ la. Ala ye o loon kabakoman minw d'i ma diɲɛ na, o ye i niyɔrɔ ye i ka baara la i be min kɛ diɲɛ na.

¹⁰I bolo be se ka koo o koo kɛ, o kɛ n'i yɛrɛ ka fanga ye. Bari, lahara min ye i taayɔrɔ ye, baarako, ni jatiminɛ, ni lɔnniya, ani hakilitigiya te o yɔrɔ la.

¹¹Ne y'a ye diɲɛ kɔnɔ fana ko mɔgɔ minw seen ka teli, a ma kɛ ko ɲɔgɔndanboli be diya olu dama na. Kɛlɛ te diya fangatigi dama na fana, kolɔnbaga be dɛsɛ dumuniko la, hakilitigi be dɛsɛ nafoloko la, boɲa te la lɔnnikɛla kan. Sabu, barinako be se k'u bɛɛ sɔrɔ.

¹²Tiɲɛ na, adamaden t'a sawaati lɔn. I ko jɔɔ be jigɛ minɛ cogo min na, i ko jaan be kɔnɔ minɛ cogo min na, o cogo kelen na, gwɛrɛgwɛrɛko be cun adamadenw kan.

¹³Ne ye lɔnniya sifa dɔ ye diɲɛ kɔnɔ min ye ne kabakoya.

¹⁴Dugu dɔ tun be yen, a kɔnɔ mɔgɔw man ca. Masacɛ fariman dɔ wilila ka n'a datugu, k'a ka kɛlɛdenw dogoyɔrɔ labɛn ka dugu lamini.

¹⁵Fantancɛ dɔ tun be dugu nin na, hakili tun b'a fɛ. A ka lɔnniya sababu la, dugu kisira. Nga mɔgɔ si hakili ma to fantancɛ nin la.

¹⁶O la, ne y'a fɔ ko lɔnniya ka fisa ni fangatigiya ye. Nga fantan ka lɔnniya te jati. U te mɛnni kɛ a ka ladili la.

¹⁷Ka hakilitigi ka kuma magaman lamɛn, o ka fisa ni nalomanw kuntigi pɛrɛnkan ye.

¹⁸Lɔnniya ka fisa ni kɛlɛkɛminanw ye. Nga kojugukɛla kelen be koɲuman caaman cɛn.