Read dyu Dusukasidɔnkili kitabu 2 Bible Online

Dusukasidɔnkili kitabu 2 - dyu bible

Dusukasidɔnkili kitabu 2

¹Ne be i ko feerenfitini, lɛɛ kɔnɔ, ne be i ko lisifeeren dama lɛɛ kɔnɔ.

²Yiri ɲanaman falennin kura be ŋɔniyiriw cɛma cogo min na, ne kanubaga be ten sunguruw cɛma.

³Yiriden diman be cogo min na tuu kɔnɔ, ne kanubaga be ten kanbelenw cɛma. A ka di ne ye ka sigi a suma kɔrɔ. A deen fana ka di ne daa la!

⁴A be don ni ne ye nisɔndiyaso kɔnɔ. A ka taamasiɲɛ ne faan fɛ, o ye kanuya ye.

⁵Ŋɔmi min dilanna ni yiriden ye, aw k'o dɔ di ne ma ka barika don n na, ka yiriden dɔw di ne ma ka fanga don n na. Bari, cɛko kɛra bana ye n ma.

⁶A numanbolo ka to ne kuun kɔrɔ, a kinibolo ka meleke ne la.

⁷Heyi! Zeruzalɛmu sunguruw, minanw [1] ni mankalaninw kosɔn, ne b'aw daali ko aw kana n kanubaga kunun, aw kan'a to a be wili n'a man d'a ye.

⁸Ne tulo be n kanubaga kaan na! A filɛ nin ye, a be nana! A be panpanna kuluw kan, a be panpanna tintinw kan!

⁹Ne kanubaga bɔnin be minan fɛ, walima mankalaninden fɛ. A lɔnin filɛ kɛnɛma an ka kogo kɔfɛ. A be filɛli kɛra fenɛtiri fɛ, a be dɛnna ka filɛli kɛ karasa woo fɛ.

¹⁰Ne kanubaga be dɔnkili lara, a ko ne ma: «Wili, ne terimuso, ne ka cɛɲumanin, na yan.

¹¹Bari, nɛnɛ waati tɛmɛna, sanji tigɛra, a tena na sisan.

¹²Feerenw be bɔra kongo, dɔnkili lawaati sera, tubaninw kasikan be mɛnna an ka mara la.

¹³Toro be mɔna, *ɛrɛzɛn be feerenna, a kasa ka di. Wili, ne terimuso, ne ka cɛɲumanin, na yan.

¹⁴Ee! Ne ka tuganin, e min be fɔɔ kuluw kunna farawo la, a to ne b'i ɲada filɛ dɛ, a to ne b'i kumakan mɛn sa. Bari e kaan ka di. I ɲada ka ɲi.»

¹⁵Aw ka kongowulu nunu minɛ dɛ, wuludennin minw b'an ka ɛrɛzɛnforow cɛnna, k'a sɔrɔ u feerenin lo!

¹⁶Ne kanubaga ye ne ta ye, ne fana ye ale ta ye. A b'a ka begɛnw dɛndɛ lisiyiriw cɛma.

¹⁷Ni tile sumana, ni yiriw suma tagara yɔrɔjan, i ka kɔsegi ka na. Ne kanubaga, kɛ i ko minan, walima mankalaninden min be kuluw kan, kulu minw bɔnin be ɲɔgɔn na.