Read dyu Dusukasidɔnkili kitabu 5 Bible Online

Dusukasidɔnkili kitabu 5 - dyu bible

Dusukasidɔnkili kitabu 5

¹N be nana n ka nankɔ la n dɔgɔmuso, ne maminɛmuso, ka n ka fɛɛn kasadiman ni n ka wusulan bɔ, ka n ka liɲaga n'a tulu dumu, ka n ka duvɛn ni n ka nɔnɔ min! Aw ka dumuni kɛ, terimanw, ka minni kɛ k'aw ɲanamini kanuya kɔnɔ!

²Ne tun be sinɔgɔra, nga ne ma ɲinɛ, n ka kanbelen be daa kɔkɔra, n tulo b'a kaan na. A ko: «Daa yɛlɛ n dɔgɔmuso, ne maminɛmuso, ne ka tuganin, ne ka dafanin! Bari ne kuun bɛɛ ye komiji ye, ne kunsigi bɛɛ ɲigira sufɛ jii bolo.»

³Ne ye n ka fani bɔ ka ban, ne be segi k'o don cogo di? Ne ye n seenw ko ka ban, ne be segi k'o nɔgɔ cogo di?

⁴Ne kanubaga y'a bolo don daa woo fɛ, ne kɔnɔ bɛɛ gwanna.

⁵Ne wilila ko n be daa yɛlɛ n kanubaga ye, ne bolo bɛɛ tun ye tulu kasadiman ye, tulu kasadiman bɔra ne tigɛ la ka kɛ daa sɔgɔlan kan.

⁶Ne ye daa yɛlɛ n kanubaga ye, o y'a sɔrɔ a y'a kɔɔ don, a tagara. Ne tun te n yɛrɛ kala ma tugu, n bɔr'a kɔ. Ne y'a yɔrɔ ɲini ka dɛsɛ, n m'a ye. Ne y'a wele ka dɛsɛ, a ma ne laminɛ.

⁷Dugu kɔlɔsibagaw ye ne kunbɛn, n'u be dugu munumununa. U ye ne bugɔ ka n mandimi, ka ne ka delekeba bɔ n kaan na, dugu laminikogo kɔlɔsibaga nunu!

⁸Ee! Zeruzalɛmu sunguruw, n'aw ye ne kanubaga ye, aw bena mun le fɔ a ye sa? Ne b'a ɲini aw fɛ, aw k'a fɔ a ye ko cɛko kɛra bana ye n ma!

⁹Ele min cɛɛ ka ɲi ni musow bɛɛ ye, o tuma na, mun le b'i kanubaga nin na n'o te kanbelen tɔw la? Mun le y'a fisaya ni kanbelen tɔw ye fɔɔ n'i b'o koo ɲininga anw fɛ?

¹⁰Ne kanubaga gwɛnin lo, a fari be manamana. N'a be kanbelen waa tan cɛma, a be lɔn ka bɔ u bɛɛ la.

¹¹A kuun be i ko sanu, sanu yɛrɛ yɛrɛ. A kunsigi be i ko koto, u finna i ko kaankaan.

¹²A ɲadenw cɛɛ ka ɲi i ko tuganin, kɔda la. U gwɛra i ko nɔnɔ. U sigicogo ka ɲi.

¹³A yewagaw be i ko nankɔ kasadiman, wusulan falennin be yɔrɔ min. A dagolo cɛɛ ka ɲi i ko lisiyiri, mire kasadiman be bɔra min na.

¹⁴A bolow bɛɛ ye sanu ye, kabakuru sɔngɔgwɛlɛnw ɲagaminin be min na. A fari cɛɛ ka ɲi i ko samaɲin nugunin, kabakuru bulamanw dondonnin be min na.

¹⁵A senkalaw be i ko kabakurugwɛ, minw lɔra sanu yɛrɛ yɛrɛ kan i ko dugumatugu. A ɲada ka ɲi i ko Liban kuluw, bɔɲɔgɔnko t'a la i ko sɛdiriyiri.

¹⁶A daa ka di, a yɔrɔ bɛɛ be ne nigɛla wili. Ne kanubaga be ten le, Zeruzalɛmu sunguruw, ne ka kanbelen be ten le!